Італьянскае даследаванне: Колькасць інфекцый, шпіталізацыі і смерцяў рэзка знізілася пасля вакцынацыі ад COVID-19

Гэтыя звесткі пацвярджаюць эфектыўнасць кампаніі вакцынацыі і неабходнасць хуткага ахопу насельніцтва.

Згодна з італьянскім даследаваннем, апублікаваным у суботу, колькасць выпадкаў заражэння COVID-19 сярод дарослых усіх узростаў знізілася на 80% праз пяць тыдняў пасля першай дозы вакцыны Pfizer, Moderna або AstraZeneca. Пра гэта піша агенцтва Reuters (пераклад - «Европейская правда»).

Першае такое даследаванне, праведзенае краінай Еўрапейскага звязу паводле рэальных вынікаў кампаніі імунізацыі, было зроблена Нацыянальным інстытутам аховы здароўя Італіі (ISS) і Міністэрствам аховы здароўя сярод 13,7 мільёна чалавек, вакцынаваных па ўсёй краіне.

Навукоўцы пачалі вывучаць звесткі з дня пачатку кампаніі вакцынацыі ў Італіі, 27 снежня 2020 года, да 3 траўня 2021 года.

Аналіз паказаў, што рызыка заражэння SARS-CoV-2, шпіталізацыі і смерці паступова зніжалася.

«Праз 35 дзён пасля прыёму першай дозы колькасць інфекцый знізілася на 80%, колькасць шпіталізацыі на 90% і смяротнасць знізіліся на 95%», - гаворыцца ў паведамленні ISS.

«Гэтыя звесткі пацвярджаюць эфектыўнасць кампаніі вакцынацыі і неабходнасць хуткага ахопу насельніцтва, каб пакласці канец надзвычайнай сітуацыі», - заявіў прэзідэнт ISS Сільвіё Брусафера.

Сярод амаль 14 млн асоб, уключаных у італьянскае даследаванне, 95% тых, хто быў вакцынаваны Pfizer і Moderna, завяршылі цыкл вакцынацыі, у той час як ні адзін з тых, хто атрымаў AstraZeneca, не атрымаў другую дозу.

Дагэтуль Італія прытрымлівалася рэкамендацый вытворцаў, уводзячы другую дозу Pfizer праз тры тыдні пасля першай, другую дозу Moderna пасля чатырохтыднёвага перапынку і другую дозу AstraZeneca пасля 12-тыднёвага перапынку.

На раніцу суботы блізу 8,3 мільёна італьянцаў, або 14% насельніцтва, былі цалкам вакцынаваныя, а амаль 10 млн чалавек атрымалі першую прышчэпку.