Меркаванне: Яшчэ ніколі не было адтоку сілавікоў такога ўзроўню

Цяперашняя сітуацыя беспрэцэдэнтная.

Тэлеграм-канал «Рэфлексія і рэакцыя» вяртаецца да інтэрв'ю экс-начальніка аддзела ГУБАЗіК Аляксандра Азарава. І вызначае ў ім важны момант.

- У інтэрв'ю самая цікавая апошняя фраза: «Толькі нашы чальцы, якія з намі працавалі, будуць адназначна ў новай Беларусі і зоймуць нават вышэйшыя пасады».

Так BYPOL яшчэ не размаўляў. Адкрытым тэкстам і дзёрзка. Каб перамагчы Цмока трэба стаць Цмокам, усё па класіцы (і тут прывітанне тым, хто прагне «татальнай люстрацыі».

Няма такіх умоў змены ўлады, пры якой такая люстрацыя магчымая. Гэта рэаліі, Беларусь не вызваляць ні іншапланецяне, ні войска NATO. Без дапамогі сілавікоў - ніяк.

Ніколі яшчэ не было адтоку сілавікоў такога ўзроўню. Нават калі знікалі людзі на мяжы стагоддзяў, збеглі адзінкі. Узровень адтоку паказвае, што цяперашняя сітуацыя беспрэцэдэнтная, нават для сілавога блока, з якога ляпілі закрытую касту.

Але раскол ва ўсякай закрытай супольнасці - гэта натуральны эвалюцыйны стан такой супольнасці. У асноўным з унутраных прычын, якія мы нават не бачым. Калі ёсць умоўны «другі бераг», то людзі будуць імкнуцца захоўваць з ім кантакт.

Тое, што ўзровень спікераў з боку BYPOL павышаецца, паказвае, што не ўсё гладка прыкладна ўсюды ў сілавікоў, і нават калі людзей ціха звальняць, невядома хто і з якімі поглядамі прыйдзе на іх месца.

Сітуацыя вечнай паранойі для ўсіх. Таксама тыповая крызісная штука – у размове з чалавекам пры пасадзе, ты не ведаеш, хто ён напраўду і якія ў яго думкі. Толькі раней такі фонавы стрэс выкарыстоўваўся выключна для раскладання апазіцыі. Цяпер гэтая штука павярнулася супраць саміх стваральнікаў такой сістэмы.