Аб'яўленая пераможца конкурсу «Міс Сусвет»

Новай «Міс Сусвет» стала прадстаўніца Мексікі.

На 69-м конкурсе «Міс Сусвет» перамогу здабыла 26-гадовая прадстаўніца Мексікі Андрэа Меса. Як паведамляе ВВС, яна стала трэцяй прадстаўніцай гэтай краіны, якой удалося перамагчы на конкурсе.

Да гэтага Мексіка перамагала ў 1991 і 2010 гадах.

Карону пераможцы перадала Міс Сусвет 2019 года, мадэль з ПАР Зазібіні Тунцы. У пяцёрку найлепшых сёлета ўвайшлі таксама прадстаўніцы Бразіліі, Індыі, Дамініканскай Рэспублікі і Перу.

Меса вывучала распрацоўку праграмнага забеспячэння і заявіла, што ганарыцца быць «жанчынай, якая атрымала прафесію ў сферы, дзе дамінуюць мужчыны». Яна таксама з'яўляецца актывісткай і працуе з Муніцыпальным інстытутам жанчын, якія змагаюцца за спыненне гендэрнага гвалту.

У сваёй фінальнай прамове, каментуючы тое, як развіліся стандарты прыгажосці, Меса заявіла, што чалавецтва развілася як грамадства, але развіліся і стэрэатыпы.

«Прыгажосць - гэта не проста тое, як мы выглядаем. Для мяне прыгажосць - гэта тое, што выпраменьвае наш дух і нашы сэрцы. Ніколі не дазваляйце нікому казаць вам, што вы не вартыя», - заявіла новая Міс Сусвет.

Найлепшай у конкурсе нацыянальных касцюмаў прызналі Тузар Вінт Лвін з М'янмы. Дзяўчына выкарыстала конкурс, каб заявіць пра сітуацыю ў сваёй краіне, і выступіла супраць вайсковага перавароту ў М'янме. Яна выйшла на подыум конкурсу ва ўборы рэгіёну Чын, дзе апошнія дні працягваюцца баі паміж арміяй і праціўнікамі хунты. У руках яна несла плакат «Маліцеся аб М'янме».