Ізраіль знішчыў падлодку тэрарыстаў ХАМАС: відэа
- 18.05.2021, 12:40
- 8,424
Удар па субмарыне быў нанесены з дапамогай беспілотніка.
Войска Ізраіля заявіла пра знішчэнне субмарыны тэрарыстычнай арганізацыі ХАМАС у сектары Газа, паведамляе nv.ua.
Як паведамляецца, удар па падводным апараце палестынскіх баевікоў быў нанесены беспілотнікам.
ЦАХАЛ таксама апублікаваў адпаведнае відэа, на якім ракета трапляе па цэлі, якая знаходзіцца ў вадзе побач з берагам.
סיכול כלי צולל בלתי מאויש בצפון הרצועה מוקדם יותר היום: pic.twitter.com/eltPJRgprP
— צבא ההגנה לישראל (@idfonline) May 17, 2021
Магчыма, гаворка ідзе пра падлодку саматужнай вытворчасці, якую ХАМАС выкарыстаў для кантрабанды або дыверсій супраць Ізраіля.
Эскалацыя канфлікту Ізраіля і ХАМАС
Канфлікт паміж Ізраілем і Палестынай зноў перайшоў у гарачую фазу. Яго эскалацыі папярэднічалі маштабныя пратэсты палестынцаў ва Усходнім Ерусаліме.
Падставай для гэтага стала пастанова ізраільскага суда аб прымусовым высяленні дзясяткаў чалавек у раёне Шэйх-Джара.
Падчас пратэстаў адбыліся сутыкненні з паліцыяй.
Са звестак уладаў Ізраіля, 8 траўня каля мячэці Аль-Акса траўмы атрымалі не менш за 15 сілавікоў і 163 палестынцы.
Праваахоўнікі паведамілі, што выкарысталі сілу пасля таго, як «сотні падазраваных пачалі кідаць камяні, бутэлькі і іншыя прадметы ў сілы бяспекі».
9 траўня Вярхоўны суд Ізраіля адклаў прыняцце пастановы аб магчымасці высялення палестынцаў.
10 траўня ХАМАС запатрабаваў вывесці сілавікоў з комплексу мячэці Аль-Акса, а пасля заканчэння тэрміну выстаўленага ультыматуму нанёс першы ракетны ўдар.
З тых часоў па ізраільскай тэрыторыі было выпушчана блізу 3 тысяч набояў.
У адказ на гэта ЦАХАЛ пачаў наносіць удары па аб'ектах баевікоў у сектары Газа.
З абодвух бакоў ёсць страты забітымі і параненымі.