СБУ раскрыла схему кантрабанды паліва з Беларусі і Расеі на $3,65 мільёна
4- 18.05.2021, 17:27
- 11,802
Паводле папярэдніх звестак, пастаўкі вяліся ў 2020-21 гадах.
Служба бяспекі Украіны выявіла схему нелегальных паставак паліва з Беларусі і Расеі на суму блізу 3,65 мільёнаў даляраў.
Аператыўнікі ўстанавілі, што прадукцыя пастаўлялася на адрас шэрагу камерцыйных структур без выплаты мытных падаткаў і акцызаў. Пазбягання падаткаў, паводле версіі СБУ, камерсанты дамагаліся з дапамогай заніжэння ў дакументах змяшчэння метылавага спірту ў прадукцыі, паведамляе прэс-служба СБУ.
Паводле папярэдніх звестак, пастаўкі вяліся ў 2020-21 гадах на суму блізу 3,65 мільёнаў даляраў.
Структуры, якія атрымлівалі прадукцыю, непасрэдна перапрацоўкай не займаліся, не знаходзіліся па адрасах рэгістрацыі, а заснавальнікам, дырэктарам і бухгалтарам выступала адна і тая ж асоба. Арганізатары схемы перапрацоўвалі імпартаваны тавар на нелегальных міні-НПЗ у сурагатныя гаруча-змазачныя матэрыялы. Затым паліва прадавалася за гатоўку без афармлення бухгалтарскіх дакументаў.
Падчас ператрусаў у Кіеўскай, Чарнігаўскай і Луганскай абласцях канфіскаваныя пячаткі 300 фіктыўных фірмаў, гатоўка, абсталяванне для перапрацоўкі, метылавы спірт, хімічныя дабаўкі і гатовы сурагат агульным аб'ёмам, большым за 1 тысячу тон.
У прэс-службе СБУ ўдакладнілі, што адзін з ператрусаў праводзіўся ў доме, дзе пражывае мэр Кіева Віталь Клічко. Там былі выяўленыя дакументацыя і пячаткі 68 юрыдычных асоб, фінансава-гаспадарчая дакументацыя задзейнічаных у супрацьпраўнай схеме кампаній, кампутарная тэхніка і няўлічаныя сродкі.