Ва Украіне 101-гадовая бабуля перамагла COVID-19
1- 5.05.2021, 12:15
- 2,352
Цяпер Яўгена Аўраменка жывая, здаровая і шумная.
У Адэсе ад каранавіруса ачуняла 101-гадовая ветэранка Другой сусветнай вайны Яўгенія Аўраменка.
Пра гэта паведамляе «Суспільне».
Былая лекарка з інваліднасцю першай групы захварэла на COVID-19 у пачатку сакавіка 2021 года. Хвароба працякала ў цяжкай форме: сатурацыя ўпала да 83%, жанчына страчвала прытомнасць і задыхалася.
«Я не ведаю як захварэла. Пачала чхаць, а потым паднялася тэмпература. Я падала. Памятаю, вось стаяла, а потым раз і ўпала, нагу зламала», - распавяла жанчына.
Са слоў ейнай унучкі Алены Арабей, нягледзячы на цяжкі стан, хворую не шпіталізавалі ў шпіталь праз брак вольных месцаў.
На працягу трох тыдняў ёй дома ставілі кропельніцы і надавалі кіслародную тэрапію. Са слоў Алены, у жанчыны пачаліся ацёкі канечнасцяў і трызненне. Лекары параілі паставіць жанчыне зонд для харчавання.
«Бабуля цяпер сядзіць жывая, здаровая і шумная. І гэта, я думаю, вельмі абнадзейвае ўсіх, хто лечыцца ад COVID-19 і ўсіх іншых інфекцыйных захворванняў. Таму што ўсё ж гэта можна зрабіць, але галоўнае мець падтрымку», - распавяла Алена.