У менскай паліклініцы з цяжкасцю знайшлі дозу «Спутника V» для рэвакцынацыі
- 6.05.2021, 14:29
- 3,744
Журналістка прыехала ў лякарню і пабачыла перад сабой зачыненыя дзверы кабінета.
5 траўня журналістка Інэса Плескачэўская паспрабавала зрабіць паўторную прышчэпку «Спутника V» у менскай паліклініцы №4. Але ўсё выявілася не так проста, паведамляе «Еўрарадыё».
Прыехаўшы ў паліклініку, яна напаролася на зачыненыя дзверы кабінета, дзе яе вакцынавалі 21 дзень таму:
«Пытаемся вакол - ніхто нічога не ведае. Падыходзіць паджылая пара, яна на мыліцах - з тым жа здзіўленнем і пытаннем. Кажу ім, каб сядзелі і нікуды не хадзілі, я пра ўсё даведаюся. Цяпер у мяне адказнасць не толькі за сябе і мужа, але і за гэтых людзей. Бегаю па лабараторыі, пытаюся - ніхто нічога не ведае: «Чаму я наогул павінна гэтым займацца?»
Нарэшце журналістка датэлефанавалася да галоўнага лекара. Тая зверылася з часопісам прышчэпак і паабяцала, што вакцыну зараз размарозяць і ўсіх ахвотных прышчэпяць.
«Хіба гэта так складана: напісаць аб'яву на дзвярах кабінета, зрабіць так, каб у рэгістратуры і праз тэлефон канкрэтна адказвалі на канкрэтнае пытанне? І як наогул праводзіцца рэвакцынацыя, калі мы яе дамагаліся са скандалам?» - задаецца пытаннямі журналістка.
Пры гэтым мужу Плескачэўскай, які яшчэ не вакцынаваны, прапанавалі кітайскую вакцыну Sinopharm. А вось калі з'явіцца «Спутник V» - невядома.
На гэтым сітуацыя не сканчаецца. Пры спробе даведацца, калі можна будзе атрымаць сертыфікат пра вакцынацыю, журналістка высветліла, што ў Беларусі ён яшчэ толькі распрацоўваецца. «Мала таго, што ў Еўропе «Спутник V» не прызнаюць, дык у нас яшчэ і сертыфікаты пра вакцынацыю не выдаюць», - рэзюмуе яна. І спісвае сітуацыю на «бязладдзе ў асобна ўзятай паліклініцы».
З заяў чыноўнікаў ад аховы здароўя, масавая вакцынацыя ў Беларусі пачалася ў пачатку красавіка (хоць Плескачэўскай у паліклініцы сказалі, што яна яшчэ не пачалася). Паводле звестак Міністэрства аховы здароўя, на прышчэпкі запісалася 400 тысяч чалавек.