23 чэрвеня 2021, Серада, 12:29
Сім сім, Хартыя 97!
Рубрыкі

Беларус, які ўдзельнічаў у выпрабаванні «Спутніка V», праз паўгода праверыў, што яму ўкалоў

8
Беларус, які ўдзельнічаў у выпрабаванні «Спутніка V», праз паўгода праверыў, што яму ўкалоў
ФОТА: З АСАБІСТАГА АРХІВА

Прышчэпку або плацэба?

Мянчук Вадзім Шорнікаў быў у ліку 100 першых беларусаў, якія ў кастрычніку летась вырашылі паўдзельнічаць у праграме выпрабавання расейскай вакцыны ад каранавіруса «Спутнік V». Па ўмовах даследавання, пра змест ампулы - вакцына або плацэба - не ведаў ніхто: ні добраахвотнікі, ні медыкі. Праз паўгода Вадзім праверыў, што ж яму ўкалолі, паведамляе tut.by.

Як праходзіла выпрабаванне

38-гадовы Вадзім працуе ў сферы будаўніцтва. Мінулай восенню яго сям'я з навін даведалася пра тое, што ахвочым беларусам прапануюць узяць удзел у выпрабаванні расейскай вакцыны.

- Ініцыятарам у большай ступені была жонка. Але я і сам вельмі баяўся захварэць. У мяне ковідам цяжка хварэў брат, са шпіталізацыяй. І я ўсё гэта бачыў і разумеў, што асноўнае, што можа прадухіліць захворванне, - гэта вакцынацыя, - тлумачыць сваю матывацыю мянчук.

Сямейная пара падала заяўкі, і іх дваіх ухвалілі ў праграму. Перад уколамі рабілі шэраг аналізаў, у тым ліку правяралі і на наяўнасць антыцелаў - іх не было. Інакш, тлумачыць Вадзім, ад праграмы бы адхілілі: такія выпадкі ў іх наборы былі.

Пра тое, што ім будуць уводзіць - плацэба або вакцыну, - Вадзім не ведаў.

- Пыталіся ў лекараў, але яны самі не ведалі: праграма цалкам расейская. Усе нашы аналізы таксама адпраўлялі туды. Таемна спадзяваліся, што ўсё ж нам дастанецца вакцына.

Дык прышчэпка або плацэба?

І на першы, і на другі укол у Вадзіма была рэакцыя: пачырванела шыя, была ламата ў целе, дрыжыкі, на раніцу - звон у вушах. Але праграма даследавання складалася не толькі ў двух прышчэпках: Вадзім некалькі разоў здаваў аналізы для кантролю стану. Апошні быў праз паўгода - гэта значыць у красавіку сёлета.

- Трохі знерваваў такі момант: мы ў лістападзе прышчапіліся, потым вакцыну ў краіне афіцыйна зарэгістравалі. Але нам так і не сказалі, каму што ўкалолі. Хоць ужо пачалася асноўная кампанія вакцынацыі. І ў мяне на працы, напрыклад, прапанавалі зрабіць прышчэпку ўсім ахвочым.

Вадзім наважыў не чакаць, і калі ў Менску сталі даступныя поствакцынальныя паўколькасныя тэсты, - зрабіў такі на платнай аснове. Антыцелы ў яго выявіліся.

ВЫНІК ПАЎКОЛЬКАСНАГА ТЭСТУ ВАДЗІМА
ФОТА: TUT.BY

- Узрадаваўся, што ўсё ж такі ўпаролі вакцыну. А яшчэ, што праз паўгода ў мяне такі паказчык. Спадзяюся, яе дзеяння на паўтара-два гады хопіць. Буду перыядычна правяраць, глядзець, як змяняецца імунітэт.

Вадзім кажа, што сваё меркаванне з нагоды вакцынацыі нікому не навязвае. Але вынікам тэсту з антыцеламі падзяліўся з калегамі ў агульным чаце.

- У калегаў - два лагеры. У сваякоў таксама рознае стаўленне. Але я для сябе вырашыў: нягледзячы на вынік, масачны рэжым не адмяняць і працягваць апрацоўваць рукі санітайзерам. На шчасце ці на жаль, гэта ўжо звычка.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».