Кошты нафты перайшлі да зніжэння

Кошт нафты падае на зніжках ад савудзітаў і асцярогах локдаўна ў Індыі.

Кошты нафты аднавілі зніжэнне пасля красавіцкага ралі, што падкінуў кошт Brent амаль да адзнакі 70 даляраў за барэль, паведамляе finanz.ru.

На фоне пастановы Савудаўскай Арабіі знізіць кошт сваіх гатункаў для Азіі і Еўропы і навін з Індыі, дзе ўлады разглядаюць агульнанацыянальны локдаўн, катыроўкі «чорнага золата» пайшлі ўніз на таргах у чацвер.

На 19.18 паводле Менску ліпеньскія ф'ючэрсы на гатунак Brent таннеюць на 1,07%, да 68,23 даляра за барэль, а адносна пікаў таргоў напярэдадні страчваюць 1,7 даляра, або 2,4%. Кантракты на WTI зніжаюцца ў Нью-Ёрку на 1,25%, да 64,81 даляра за бочку.

Напярэдадні дзяржаўная нафтавая кампанія Савудаўскай Арабіі Saudi Aramco абвясціла, што зніжае афіцыйныя кошты для свайго ключавога, азіяцкага рынку.

Скідкі, абвешчаныя ўпершыню са снежня летась, складуць 10 цэнтаў за барэль для гатунку Arab Light, 20 цэнтаў - для Аrab Medium і 30 цэнтаў - для Heavy. У Еўропе, дзе савудаўская нафта канкуруе з расейскай Urals, дысконты будуць яшчэ вышэйшыя - ад 20 да 80 цэнтаў у залежнасці ад маркі.

Рынак чакаў, што Saudi Aramcо зрэагуе на сітуацыю ў Індыі, дзе новыя звышзаразныя штамы Covid-19 спарадзілі эпідэміялагічную катастрофу, распавялі Reuters нафтатрэйдары, што працуюць у Азіі.

У апошнія два тыдні колькасць хворых у краіне кожны дзень перавышала 300 тысяч чалавек, а за мінулыя дні ўзляцела да рэкордных 412 тысяч, у той час як агульная колькасць тых, хто захварэў пераваліла за 21 мільён.

Міністэрства аховы здароўя Індыі заявіла, што разглядае магчымасць агульнанацыянальнага локдаўна.

Індыя з'яўляецца трэцім па велічыні спажыўцом нафты ў свеце. Рэзкі рост захворвання ўжо ўдарыў па попыту на паліва ў краіне і вымусіў НПЗ скараціць загрузку, а з ёй - і закупкі сыравіны на спот-рынку, кажуць крыніцы Reuters у нафтатрэйдынгавых кампаніях.

Спажыванне нафты ў Індыі абрынулася ў траўні на 0,5-1 млн барэляў у дзень, ацэньвае Оле Хансен, галоўны стратэг Saxo Bank у сыравінных таварах.

Зрэшты, правал азіяцкага попыту кампенсуюць Еўразвяз і ЗША, дзе спажыванне бензіну выйшла на даковідныя ўзроўні, а аб'ём запасаў нафты ў камерцыйных сховішчах скараціўся на 8 млн барэляў за мінулы тыдзень - рэкордна са студзеня.

«Рынак, які падтрымліваецца інвестарскім попытам, усё больш арыентуецца на «раскрыццё» эканомік Еўразвязу і ЗША, што перавешвае праблемы з попытам у пашкоджаных каранавірусам рэгіёнах Азіі», - кажа Хансен.