Прамысловасць Расеі «нырнула» ў інфляцыйную яму

Фабрыкі і заводы РФ сутыкнуліся з рэкордным за апошнія гады павелічэннем выдаткаў.

У той час як Расстат паведамляе пра «стабілізацыю інфляцыі» на ўзроўні спажыўцоў, прамысловыя прадпрыемствы Расеі фіксуюць імклівы рост цаны адпраўкі і закупкі. Фабрыкі і заводы перапрацоўчага сектара ў красавіку сутыкнуліся з рэкордным за 6 гадоў павелічэннем выдаткаў, паказала апытанне топ-мэнэджараў 300 прадпрыемстваў, праведзенае IHS Markit, піша sprotyv.info.

Індэкс коштаў сыравіны і матэрыялаў, які адсочвае інфляцыйны складнік штомесячнага індыкатара дзелавой актыўнасці PMI, трымаецца вышэй за адзнаку 70 пунктаў ужо амаль паўгода, чаго статыстыка не бачыла ні разу з глабальнага фінансавага крызісу 2008 года.

Адбіваецца глабальны рост коштаў сыравінных тавараў, узлёт кошту марскіх перавозак да 11-гадовага піка, а таксама збоі ў ланцужках паставак і абмежаванні на транспартаванне, праз якіх затрымкі з выкананнем заказаў дасягнулі максімуму з другога квартала 2020 года.

Свае выдаткі вытворцы вымушаныя перакладаць на кліентаў, падвышаючы адпускныя кошты: у красавіку іх рост стаў самым значным з лютага 2015 года, адзначае Markit.

Звесткі Расстата (за сакавік) пацвярджаюць: індэкс коштаў вытворцаў амаль утрая апярэджвае спажывецкую інфляцыю - 16% супраць 5,8%. Вытворцы прадуктаў харчавання паднялі кошты на 15,8% год да года, металургі - на 19,1%, хімічныя заводы - на 20,9%, а НПЗ - на 30,3%.

Рост коштаў у апрацоўчай прамысловасці падагравае скачок кошту сыравіны амаль на траціну год да году. Па вялікім рахунку, гэта інфляцыя выдаткаў для ўсіх сектараў эканомікі, мяркуюць аналітыкі. Па меры таго, як ціск на выдаткі ўзмацняецца, а вытворцы павышаюць кошты, шэраг з іх пачынаюць фіксаваць скарачэнне попыту, паказвае эканаміст IHS Markit Шыян Джонс.

За красавік упершыню з пачатку года расейская прамысловасць сутыкнулася з падзеннем колькасці новых заказаў як на ўнутраным, так і на вонкавых рынках. У выніку індэкс дзелавой актыўнасці (PMI) знізіўся з 51,1 да 50,4 пункта, апынуўшыся ў кроку ад зоны рэцэсіі, якая пачынаецца ніжэй за адзнаку 50.

Падтрымку расейскім вытворцам надае хіба што аптымізм. «Надзеі на аднаўленне эканомікі і павышэнне попыту паднялі ўпэўненасць да самага высокага ўзроўню са студзеня 2020 года», - адзначае Джонс.