Медыкі расказалі, як аднавіць нюх пасля каранавірусу без лекаў

Распрацаваны эфектыўны метад.

Вы захварэлі на Сovid-19 і страцілі нюх? Выданне Al Jazeera расказвае, як аднавіць адчувальнасць вашых рэцэптараў без лекавых сродкаў.

Навуковая назва зніжанага нюху – гіпасмія. Сярод тых, хто захварэў на каранавірус, дзель пацыентаў з гіпасміяй можа дасягаць 25%. Паводле даследавання, апублікаванага ў часопісе PLOS Medicine, на заражэнне каранавірусам можа паказваць няздольнасць адрозніваць пах чатырох рэчаў: часнаку, цыбулі, кавы і парфумы.

Страта нюху з'яўляецца яркім сімптомам Сovid-19 і можа назірацца доўгі час.

Як лячыць?

У якасці метаду лячэння гіпасміі ў выніку заражэння каранавірусам каманда спецыялістаў рэкамендуе трэніраваць нюх. Як паведамляюць навінавыя сайты, даследаванне было праведзенае навукоўцамі на чале з прафесарам Карлам Філпатам з Норвічскай медыцынскай школы Універсітэта Усходняй Англіі і апублікаванае ў часопісе International Forum of Allergy and Rhinology.

Падчас трэніроўкі нюху пацыенту прапануецца двойчы на дзень цягам некалькіх месяцаў удыхаць пах чатырох добра знаёмых яму прадуктаў, напрыклад апельсіна, мяты, часнаку і кавы.

Пры гэтым даследнікі рэкамендавалі не ўжываць кортыкастэроіды – клас прэпаратаў, якія маюць супрацьзапаленчае дзеянне – для лячэння гіпасміі ў выніку заражэння каранавірусам.

«Кортыкастэроіды – гэта клас лекавых сродкаў, якія памяншаюць запаленне ў арганізме. Яны часта прызначаюцца лекарамі для лячэння такіх станаў, як астма, і ўважаюцца за альтэрнатыву пры лячэнні гіпасміі, выкліканай каранавірусам. Аднак яны маюць пабочныя эфекты. Сярод іх можна вылучыць затрымку вадкасці ў арганізме, высокі артэрыяльны ціск і змены псіхікі», – адзначыў прафесар у інтэрв'ю для Еurekalert.

Каманда правяла комплекснае даследаванне, заснаванае на актуальных звестках, каб выявіць, ці могуць кортыкастэроіды дапамагчы людзям вярнуць нюх.

«Як высветлілася, існуе вельмі мала сведчанняў таго, што кортыкастэроіды дапамагаюць пры гіпасміі. І паколькі яны добра вядомыя сваімі моцнымі пабочнымі эфектамі, мы раім не прызначаць іх пасля захворвання на каранавірус», – сказаў прафесар Філпат.

На шчасце, большасць людзей, якія страцілі нюх у выніку захворвання на Covid-19, аўтаматычна аднаўляе ўспрымальнасць да пахаў. Паводле вынікаў даследавання, 90% людзей цалкам ацаліліся ад гіпасміі праз 6 месяцаў.

Філпат дадаў: «Трэніроўка нюху можа быць вельмі карыснай і з'яўляецца танным і простым варыянтам лячэння без пабочных эфектаў пры самых розных прычынах страты нюху, уключаючы Covid-19».

Паводле ягоных словаў, навучанне нюху прадугледжвае аднаўленне, заснаванае на нейрапластычнасці, то-бок здольнасці мозгу перабудоўвацца і тым самым кампенсаваць змены або пашкоджанні ў арганізме.

Страта ўспрымальнасці да пахаў

Паводле адной з навуковых версій, якія тлумачаць страту нюху, гіпасмія становіцца вынікам пашкоджання нюхальнага эпітэлію ў ходзе інфекавання. Чым больш павярхоўнае пашкоджанне, тым карацейшы перыяд страты паху і смаку, і наадварот.

Паводле паведамлення Deutsche Welle у канцы сакавіка, лекары медыцынскага факультэта Універсітэта Дрэздэна з аддзялення, якое спецыялізуецца на нюху і смакавых рэцэптарах, шукаюць спосабы дапамагчы пацыенту аднавіць ранейшую ўспрымальнасць да пахаў. У выніку яны распрацавалі метад трэніроўкі нюху, які актывуе нюхальны эпітэлій.

Доктар Томас Хомель, загадчык кафедры оталарынгалогіі ўніверсітэта, патлумачыў механізмы гэтага працэсу: «Кожную раніцу і вечар цягам 30 секундаў хворыя з гіпасміяй павінны ўдыхаць пах 4 розных рэчываў. Гэтыя практыкаванні неабходна выконваць на рэгулярнай аснове хоць бы 4 месяцы. Часам тэрмін можа дасягаць 9 месяцаў».

Якія гэта пахі?

Паводле словаў доктара Хомеля, чалавек можа выбіраць прадметы або прадукты для трэніроўкі на сваё меркаванне. Аднак гэта павінны быць розныя водары, якія прымушаюць цела неяк рэагаваць, напрыклад паколваннем. Эфірныя алеі, як ружавы алей або парфума, вырабленыя з лупіны цытрусавых, а таксама травы накшталт карыцы і чабору з'яўляюцца найлепшым прыкладам рэчываў, якія валодаюць такой уласцівасцю.

Што тычыцца пераліку мяты і розных відаў воцату, яны таксама могуць выклікаць рэакцыю ў выглядзе паколвання.

Абавязкова пракансультуйцеся з лекарам

Як адзначыў нямецкі лекар, такі метад лячэння гіпасміі падыходзіць толькі тым, хто пакутуе ад страты смаку і нюху доўгі час. У той самы час ён падкрэсліў, што такому лячэнню павінен папярэднічаць візіт да лекара-спецыяліста, оталарынголага або неўролага.

Акрамя таго, прычыны страты ўспрымальнасці да паху і смаку шматлікія, у сувязі з чым неабходны комплексны дыягназ сітуацыі.