Гішпанцы адзначылі зняцце COVID-абмежаванняў алкаголем і танцамі

Людзі выходзілі на цэнтральныя плошчы, весяліліся і скандавалі розныя лозунгі.

Жыхары Гішпаніі ў ноч на нядзелю адзначылі заканчэнне рэжыму надзвычайнага становішча ў краіне, які быў уведзены праз каранавірус і доўжыўся з кастрычніка мінулага года. Пра гэта паведамляе газета El País у нядзелю, 9 траўня.

Ён скончыўся ў суботу а 22:00 паводле мясцовага часу.

У Мадрыдзе ў ноч на нядзелю людзі выйшлі на вуліцы горада, зрэшты, цэнтральная плошча Пуэрта-дэль-Соль была запоўненая дзясяткамі гараджан, яны прынеслі з сабой алкаголь, весяліліся і скандавалі розныя лозунгі.

У Барселоне сотні чалавек сабраліся ў розных частках горада ўначы, у тым ліку каля будынка Вярхоўнага суда. Яны танчылі і пілі алкаголь на вуліцах без масак, грэбуючы сацыяльнай дыстанцыяй.

Як піша газета, такія сцэны гэтай ноччу можна было назіраць у вялікай колькасці гішпанскіх гарадоў ад Мурсіі да Саламанкі.

Заканчэнне надзвычайнага становішча для гішпанцаў азначае не толькі магчымасць выпіць у бары ці сабрацца на барбекю ў парку з сябрамі, але і падарожнічаць паміж рэгіёнамі. Рэжым НС накладаў забарону на неістотныя паездкі, і многія гішпанцы з нецярпеннем чакалі магчымасці ўбачыць сваіх сваякоў, якія жывуць у іншых гарадах, калі рэжым будзе зняты.

Як паведамлялася, гішпанскія ўлады разлічваюць з чэрвеня адкрыць уезд для турыстаў. Для ўезду ў краіну падарожнік павінен мець даведку аб прышчэпках дзвюма дозамі вакцын, дазволеных у Еўразвязе, або даведку аб тым, што перахварэў на каранавірус, ці адмоўны тэст на COVID-19.