У Віцебску пачалі «бяліць» дрэвы ў зялёны колер
17- 9.05.2021, 21:12
- 23,156
Каб ніхто не дамалёўваў чырвоную палоску на белым ствале?
Пабел штамбаў дрэў - традыцыйная забаўка камунальных, а сёлета ў Віцебску ўжылі зялёны колер, піша сайт «Народныя навiны Вiцебска».
Уласна само мерапрыемства па афарбоўцы ствалоў дарослых дрэў у белы колер ніякага сэнсу не мае, акрамя асваення бюджэтных грошай. Ёсць здагадка, што дрэвы ўздоўж дораг і вуліц сталі фарбаваць белым колерам, каб пазначыць перыметр праезнай часткі для тэхнікі, якая рухаецца са святломаскіроўкай або зусім з выключанымі фарамі.
Традыцыя гэтая прыжылася ў гарадах постсавецкай прасторы, з'яўляючыся сімвалам так званага навядзення парадку на зямлі.
Але ў Віцебску наважыліся да таго ж творча развіць гэтую традыцыю, цяпер у горадзе мастакоў штамбы дрэў пакрываюць зялёнай фарбай! Фатаграфіі новай тэндэнцыі былі апублікаваныя ў гарадскім чаце «Віцебск: ПДР, экалогія, архітэктура».
Падпісчыкі чата зрабілі здагадку, што ноў-хаў з зялёнай фарбай абумоўленае палітычнай сітуацыяй - на белы ствол лёгка дадаць чырвоную паласу, што дасць спалучэнне колераў, якое выклікае ўстойлівую ідыясінкразію ва ўладаў.
Зрэшты, можа быць усё прасцей, магчыма, некалі Віцебск закупіў з нагоды вялікую партыю зялёнай фарбы. Бо гэты колер у апошнія гады асабліва ўлюбёны камунальнымі службамі горада, напрыклад, зялёнай фарбай пафарбавалі мост Тысячагоддзя насупраць ратушы.