Грэцыя адкрыла пляжы за тыдзень да пачатку турыстычнага сезону
- 9.05.2021, 18:19
- 1,780
Лік інфекцый у краіне знізіўся, а вакцынацыя павялічылася.
Грэцыя зноў адкрыла свае арганізаваныя пляжы на фоне паслаблення каранавірусных абмежаванняў у рамках падрыхтоўкі да вяртання замежных турыстаў на наступным тыдні.
Пра гэта паведамляе "Еўрапейская праўда".
У адпаведнасці з дзейнымі захадамі мэнэджары пляжных зонаў павінны будуць размясціць парасоны на адлегласці не менш як чатыры метры, праводзіць рэгулярную дэзынфекцыю і правяраць супрацоўнікаў пляжных бараў і іншы персанал на COVID-19.
Грэцыя атрымала поспех у стрымліванні першай хвалі пандэміі летась, але аднаўленне росту колькасці выпадкаў прывяло да таго, што ўлады ўвялі другі карантын у лістападзе.
Паколькі лік інфекцый знізіўся, а вакцынацыя павялічылася, улады няўхільна зніжалі абмежаванні, адкрываючы бары і рэстараны ў пачатку гэтага тыдня.
У пятніцу яны абвясцілі, што музеі адкрыюцца на наступным тыдні да скасавання абмежаванняў на паездкі для вакцынаваных замежных наведвальнікаў 15 траўня.
Прэм'ер-міністр Грэцыі Кірыякас Міцатакіс сказаў, што спалучэнне шырокамаштабнага тэставання, імунізацыі і таго факту, што многія мерапрыемствы будуць праводзіцца на адкрытым паветры, давала ўпэўненасць у тым, што турысты змогуць бяспечна наведаць краіну.