У расейскім Петразаводску ветэран 9 траўня выйшаў на акцыю пратэсту

Ён пратэстуе супраць незаконнай гандлёвай прыбудовы.

У Петразаводску ветэран Другой сусветнай вайны Мікалай Бакінаў выйшаў на акцыю пратэсту, каб дамагчыся зносу незаконнай гандлёвай прыбудовы «Неўскі пасаж». Ён прынёс плакат з надпісам «Дабілі жонку – дабіце і мяне», паведамляе карэспандэнт «Новай газеты».

«Даводзяць да такога стану, што выйшаў, як той казаў. Жонку забілі, так вазьміцеся за мяне, можа тады супакоіцеся? Урэшце ў нас Канстытуцыя выконваецца або парушаецца? Ніякія законы не дзейнічаюць. Жыць немагчыма ў кватэрах, мне давялося часова здымаць кватэру, таму што лекары забаранілі – інакш, сказалі, як жонка, заўчасна адыдзеце», – расказаў ён «Новай».

Жыхары дома з незаконнай гандлёвай прыбудовай сабраліся ў падтрымку ветэранаў Другой сусветнай вайны, якія адзінаццаты год разам з суседзямі змагаюцца за знос прыбудовы. Сем гадоў таму суд вынес пастанову пра яе знос, якая да гэтага часу не выкананая. Ветэраны Мікалай Бакінаў і Уладзімір Дзмяцоў на знак пратэсту здалі свае медалі да 70-годдзя Перамогі, некалькі разоў абвяшчалі галадоўку і выходзілі да прыбудовы з адзінкавымі пікетамі.

Мікалай Бакінаў за час барацьбы страціў жонку і на параду лекараў часова пераехаў на здымную кватэру. Жыхары дома кажуць, што праз прыбудову зімой пад іх вокнамі вырастаюць гурбы, а летам з даху ідзе выпарэнне, чаму ў кватэрах немагчыма знаходзіцца праз высокую тэмпературу.

Акцыя прайшла без затрыманняў. За ўдзельнікамі акцыі назіралі два супрацоўнікі паліцыі.

Напярэдадні акцыі паліцыя затрымала блогера Аляксея Трунава, які размясціў на сваёй старонцы зварот да жыхароў горада з просьбай падтрымаць ветэранаў. Яго даставілі ў спецпрыёмнік МУС і склалі пратакол паводле ч.2 артыкула 20.2 КаАП. Раніцай 9 траўня суд даў Трунаву суткі арышту.