Садык Хан зноў перамог на выбарах мэра Лондана

Ён будзе кіраваць сталіцай Вялікай Брытаніі да 2024 года.

Дзейны мэр Лондана, кандыдат ад Лейбарысцкай партыі Садык Хан другі раз перамог на выбарах кіраўніка брытанскай сталіцы. Такім чынам 51-гадовы палітык, які ўпершыню стаў лонданскім мэрам у 2016 годзе, застанецца на гэтай пасадзе яшчэ тры гады, паведамляе BBC.

Звычайна мэра Лондана абіраюць на чатыры гады, аднак папярэдні тэрмін Хана быў падоўжаны на год праз скасаванне выбараў у 2020 годзе на фоне пандэміі каранавірусу.

Асноўным канкурэнтам Хана быў кандыдат ад кансерватараў Шон Бэйлі, ён заняў другое месца.

Хоць жыхары Лондана хадзілі на выбарчыя ўчасткі толькі адзін раз, у чацвер на гэтым тыдні, выбары мэра прайшлі ў два туры. Паводле брытанскай сістэмы, пры галасаванні за мэраў гарадоў жыхары могуць падтрымаць адразу двух кандыдатаў, паказаўшы сваю першую і другую перавагу. Калі паводле вынікаў першага тура, калі лічыцца першая перавага, ні адзін з прэтэндэнтаў не набірае 50% галасоў, пачынаецца другі тур, калі падлічваюць другія перавагі выбарнікаў.

Паводле вынікаў другога тура Хан набраў 55,2% галасоў выбарнікаў (або блізу 1,2 млн), а Бэйлі – 44,8% (блізу 977 тысячаў).

"Дзякуй, Лондан. Для мяне абсалютны гонар служыць гораду, які я люблю, яшчэ тры гады", – напісаў Хан у сябе ў Твітары.

Бэйлі павіншаваў свайго канкурэнта з перамогай. "Вы павінны былі сам развязваць праблемы, а не перакладаць адказнасць на ўрад. Так што я спадзяюся, што вы справіцеся са сваімі абавязкамі", – таксама звярнуўся ён да Хана.

Ці не занадта пераканальная перамога

Садык Хан уважаўся за фаварыта цягам усёй кампаніі. Пасля абрання ў 2016 годзе ён стаў першым мусульманінам, які ўзначаліў еўрапейскую сталіцу.

Як паведамляюць карэспандэнты Бі-бі-сі, перамога Хана стала чаканай, аднак яго канкурэнт-кансерватар Шон Бэйлі атрымаў нашмат больш галасоў, чым прагназавалася. Бэйлі раней працаваў з моладдзю, ён вырас у бедным лонданскім раёне і калі яму было блізу 20, цягам некалькіх гадоў заставаўся бяздомным. Кандыдат расказваў, што ў гэты перыяд яму аднойчы давялося "біцца на стаянцы з гандляром наркотыкамі".

Адным з кандыдатаў на пасаду мэра Лондана быў нараджэнец Баку Кямран (Кам) Балаеў, ён балатаваўся ад партыі Renew. На сваёй перадвыбарнай старонцы Балаеў расказвае, што раней працаваў у Міністэрстве юстыцыі Азербайджана і скончыў Кембрыджскі ўніверсітэт. На выбарах ён стаў трэцім з канца з 20 кандыдатаў і атрымаў блізу 7,7 тыс. галасоў.

Поўныя вынікі выбараў мэра Лондана можна даведацца тут.

Асабліва трывожным для Хана стане той факт, што дзейныя мэры ў іншых рэгіёнах Вялікай Брытаніі, у тым ліку Манчэстэры і графстве Уэст-Мідлэндс (уключае ў сябе Бірмінгем), наадварот, павялічылі, колькасць сваіх выбарнікаў.

Падчас свайго знаходжання на пасадзе мэра Лондана Хан неаднаразова крытыкаваў урад краіны, у тым ліку праз каранавірусныя абмежаванні. Ён таксама паслядоўна выступаў супраць Брэксіту.

У сваю чаргу апазіцыя абвінавачвала мэра ў тым, што за час ягонага знаходжання на пасадзе ў горадзе вырасла злачыннасць, у тым ліку з выкарыстаннем халоднай зброі. Лейбарысты адказвалі на гэтыя сцвярджэнні, што рост гвалту ў Лондане звязаны з масавымі скарачэннямі ліку супрацоўнікаў паліцыі, зробленымі ўрадам кансерватараў у межах кампаніі скарачэння бюджэтнага дэфіцыту.

Апошнім і пакуль адзіным мэрам Лондана – кансерватарам быў цяперашні прэм'ер-міністр Вялікай Брытаніі Борыс Джонсан. Ён узначальваў брытанскую сталіцу цягам двух тэрмінаў, з 2008 да 2016 года. У тым ліку ён актыўна ўдзельнічаў у арганізацыі Летніх алімпійскіх гульняў у Лондане ў 2012 годзе.

Да Джонсана мэрам Лондана быў лейбарыст Кен Лівінгстан, ён атрымаў гэты пост у 2000 годзе, калі пасада абранага кіраўніка горада брытанскай сталіцы была ўпершыню створаная.