Навукоўцы стварылі самы магутны лазер, які дапаможа ў лекаванні раку
3- 9.05.2021, 19:49
- 3,630
Таксама ён, верагодна, дапаможа ў практычным даследаванні самых фундаментальных пытанняў нашага свету.
Каманда карэйскіх навукоўцаў стварыла звышмагутны лазер, які мае ўсе шанцы змяніць нашы касмічныя даследаванні, а таксама дапамагчы перамагчы рак, піша «Новы час».
Праз больш як дзесяцігоддзе працы даследнікі з карэйскага Інстытута навукі і тэхналогій Кванджу прадставілі лазер з рэкорднай інтэнсіўнасцю 10²³ Вт/см². Чан Хі Нам, адзін з навукоўцаў, якія ўдзельнічалі ў распрацоўцы, патлумачыў магутнасць лазернага променя як усю існую на Зямлі сонечную энэргію, якую сціснулі да памеру парушынкі.
Для гэтага навукоўцы пабудавалі свайго кшталту паласу перашкодаў, якая адлюстроўвае, узмацняе і кантралюе рух фатонаў, што фармуюць лазерны прамень.
Дзякуючы гэтаму яны змаглі стварыць настолькі высокаінтэнсіўны лазер, што ён, верагодна, дапаможа ў практычным даследаванні самых фундаментальных пытанняў нашага свету, якія раней разглядаліся выключна ў тэорыі – фармаванне Сусвету або вывучэнне плазмы, якая ўтвараецца пасля выбухаў звышновых.
Выкарыстоўваючы лазерныя імпульсы, даследнікі змогуць ствараць і сутыкаць электроны высокай энэргіі з фатонамі, узнаўляючы эфект Комптана, які, на думку навукоўцаў, стварае высокаэнэргетычныя касмічныя прамяні.
Але існуе таксама і больш «зямное» ўжыванне новай тэхналогіі.
Пратонная тэрапія ўважаецца за перадавы метад лячэння раку. Гэты метад выкарыстоўвае часціцы, якія накіроўваюць на пухліну пры дапамозе паскаральніка. Аднак такі від лячэння патрабуе вялікай і дарагой абароны ад радыяцыі праз гэтыя самыя паскаральнікі. Навукоўцы ўпэўненыя, што выкарыстанне лазерных прамянёў для накіравання пратонаў можа стаць ідэальнай альтэрнатывай, якая зробіць пратонную тэрапію больш даступнай.