Адключэнне ад SWIFT і санкцыі што да калію і нафты: Еўрапарламент прыняў рэзалюцыю па Беларусі
70- 10.06.2021, 17:50
- 81,192
Рэзалюцыю падтрымала большасць дэпутатаў.
Сёння Еўрапейскі парламент ухваліў рэзалюцыю па Беларусі большасцю галасоў. За рэзалюцыю прагаласавалі 626 еўрадэпутатаў, супраць - 16. Устрымаліся 36 чалавек.
У рэзалюцыі, акрамя палітычных заяваў, гаворка ідзе і пра эканамічныя санкцыі. Напрыклад, даволі вострыя для Беларусі пытанні - адключэнне SWIFT і сектаральныя санкцыі ў нафтаперапрацоўчай, калійнай і іншых галінах.
Дэпутаты Еўрапарламента заклікаюць еўрапейскія кампаніі быць асабліва абачлівымі пры вядзенні бізнэсу ў Беларусі. А таксама «ўстрымлівацца ад усякіх новых інвестыцый і таксама публічна пратэставаць супраць рэпрэсій з боку беларускіх уладаў у краіне».
Акрамя гэтага, дэпутаты патрабуюць, каб дзяржавы-чальцы ЕЗ і Еўракамісія адмаўлялі Беларусі ва ўсіх новых крэдытных лініях і інвестыцыях і ўжылі захады, каб еўрапейскія фінансавыя ўстановы не набывалі ні аблігацыі, ні ўсякія іншыя фінансавыя інструменты ад беларускага ўрада ці афіляваных структур.
«Еўрапарламент вітае той факт, што Еўрапейскі інвестыцыйны банк і Еўрапейскі банк рэканструкцыі і развіцця прыпынілі фінансаванне праектаў у беларускім дзяржаўным сектары, - гаворыцца ў заяве, - і заклікае да расследавання таго, як нявыкарыстаныя сродкі могуць быць пераарыентаваныя на грамадзянскую супольнасць і прыватны сектар».
Дэпутаты прапануюць увесці эканамічныя санкцыі «супраць дзяржаўных і прыватных кампаній, якія кантралююцца рэжымам або цесна звязаныя з яго бізнэс-інтарэсамі ці вядомыя тым, што звальняюць сваіх супрацоўнікаў за ўдзел у страйках або пратэстах».
Адно з важных патрабаванняў - гэта ўвесці сектаральныя санкцыі, напрыклад, у дачыненні да сырой нафты і нафтапрадуктаў, калійнай, сталеліцейнай і дрэваапрацоўчай прамысловасці.
«Акрамя таго, Еўрапарламент заклікае да спынення супрацоўніцтва і фінансавання беларускіх дзяржаўных банкаў і да абмежавання крэдытных ліній ад міжнародных банкаў для даччыных банкаў у Беларусі, а таксама да разгляду магчымасці часовага выключэння Беларусі з сістэмы SWIFT», - адзначаецца ў заяве.
Таксама ў рэзалюцыі сказана, што дэпутаты просяць кампаніі Еўразвязу, зрэшты, Siemens AG, «спыніць супрацоўніцтва з уладамі Беларусі шляхам абмену тэхналогіямі і ноў-хаў». Таксама дэпутаты патрабуюць спыняць кантрабанду цыгарэтаў з Беларусі. Пры гэтым яны заклікаюць дзяржавы-чальцы ЕЗ дапамагчы тым, хто можа пацярпець ад санкцый у дачыненні да Беларусі.
У рэзалюцыі таксама сказана і пра заклапочанасць з нагоды выкарыстання Астравецкай АЭС, якая знаходзіцца ў 45 кіламетрах ад Вільні. Дэпутаты заклікаюць увесці «захады абароны ад наўпроставага або ўскоснага продажу беларускай электраэнэргіі, вырабленай Астравецкай электрастанцыяй, на рынкі ЕЗ».
Між тым у рэзалюцыі гаворка ідзе пра тое, каб правесці міжнародную канферэнцыю «Будучыня дэмакратычнай Беларусі» для ўрэгулявання крызісу ў краіне, а таксама для «расследавання злачынстваў і судовага пераследу за іх учыненне». Дэпутаты прапануюць правесці яе з удзелам міжнародных фінансавых інстытутаў, краін «Вялікай сямёркі», дзяржаў-чальцоў і інстытутаў ЕЗ і гэтак далей.
Акрамя таго, дэпутаты вітаюць план «эканамічнай падтрымкі будучай дэмакратычнай Беларусі на суму 3 млрд еўраў, прадстаўлены Камісіяй» і заклікаюць Камісію і Раду Еўразвязу да далейшага развіцця і папулярызацыі гэтага плана.