У рэдакцыю салігорскага медыя «Лідэр-Прэс» прыйшлі з ператрусам
5- 11.06.2021, 9:26
- 5,612
Сілавікі прыйшлі і дадому да ўладальнікаў выдання.
У рэдакцыі прыватнага салігорскага медыя "Лідэр-Прэс" напярэдадні прайшоў ператрус, паведамляе Беларуская асацыяцыя журналістаў. Сілавікі прыйшлі і дадому да ўладальнікаў выдання Уфімцавых.
Галоўная рэдактарка "Лідэр-Прэс" Галіна Уфімцава не стала распавядаць падрабязнасці, патлумачыла падпіскай пра невыдаванне, якую далі ейны сын і нявестка. Іх напярэдадні забіралі ў пастарунак. Апытвалі, а затым адпусцілі. Малодшыя Уфімцавы таксама з'яўляюцца супрацоўнікамі "Лідэр-Прэс".
Зараз медыя працуе толькі як інфармацыйны партал, аднак да сакавіка рэдакцыя выпускала і друкаваную версію. У пачатку вясны ад газеты давялося адмовіцца. Тады ў рэдакцыі гэты крок патлумачылі эканамічнымі прычынамі - сказалі, што яшчэ пару гадоў таму "Лідэр-Прэс" быў паспяховым бізнэс-праектам, "які чыталі амаль у кожнай другой сям'і Салігорска". Штотыднёвы наклад мог даходзіць да 18 тысяч асобнікаў, выданне мела "вялікі прыбытак".
"За апошнія тры гады многае змянілася", - адзначылі тады ў рэдакцыі.
На працягу апошняга года ў Беларусі цэлы шэраг недзяржаўных газет засталіся без друкаваных версій. Перасталі выходзіць на паперы як вялікія выданні ("Свободные навіны плюс", "БелГазета", "Народная воля"), так і рэгіянальныя ("Брестская газета"). У большасці выпадкаў прычына ў тым, што друкарні адмаўляюцца друкаваць незалежныя медыі.