Андрэй Краўчанка: Алімпіяда - гэта важна, але свабода важнейшая

Калі спартовец гатовы псіхалагічна і фізічна, то яго ўжо складана зламаць.

Андрэй Краўчанка, срэбраны прызёр Алімпійскіх гульняў у Пекіне, пракаментаваў інфармацыю пра тое, што беларускія спартоўцы не змогуць паляцець на Алімпіяду ў Токіё рэйсам «Белавія», піша сайт tribuna.com.

«Думаю, што ўскладненне сітуацыі з пералётам хутчэй ніяк не паўплывае на вынікі. Калі спартовец гатовы псіхалагічна і фізічна, то яго ўжо складана зламаць.

Бывалі выпадкі, калі мы ехалі камандай мнагаборцаў у маршрутцы ў Польшчу амаль дваццаць гадзін, і нашы сумкі былі ў салоне, але гэта не перашкаджала нам перамагаць!

Што тычыцца спартоўцаў, якія маўчаць і паставілі Алімпіяду вышэй за людзей, якія за іх заўзеюць і перажываюць... Гэта іх жыццёвы шлях, гэта іх выбар. Я бачу, як многія змяніліся і робяць выгляд, што «мы рыхтуемся і ўсё астатняе нас не датычыцца». Алімпіяда - гэта важна, але не самае галоўнае ў жыцці. Ёсць рэчы куды важнейшыя, напрыклад, жыццё і свабода», - сказаў Краўчанка.