Літоўскі дэпутат прапанаваў пабудаваць на мяжы з Беларуссю агароджу

Афіцыйны Менск каардынуе нелегальную міграцыю ў краіны ЕЗ.

Старшыня парламенцкага Камітэта нацыянальнай бяспекі і абароны (КНБА), дэпутат Сейма Літвы Лаўрынас Кашчунас заявіў, што ўсталявання сістэм назіранняў на мяжы з Беларуссю будзе недастаткова для барацьбы з нелегальнай міграцыяй.

Пра гэта паведамляе BNS.

Паводле звестак Службы аховы дзяржаўнай мяжы Літвы (САДМЛ), сёлета ў Літву з Беларусі нелегальна спрабавалі трапіць 329 мігрантаў. У асноўным гэта грамадзяне Ірака. Улады Літвы мяркуюць, што беларускі рэжым хоча напоўніць краіну нелегаламі.

У сувязі з гэтым у краіне актываваны так званы «план прыкрыцця» з прыцягненнем войска. На межах будзе ўзмоцненая сістэма сачэння і пабудаваныя спецыяльныя намётавыя мястэчкі для мігрантаў.

Аднак Кашчунасу не выстарчыла ўжытых урадам захадаў. Ён мяркуе, што на мяжы з Беларуссю трэба пабудаваць агароджу. Гэта будзе «важным элементам стрымлівання», мяркуе дэпутат.

«Можа, не на ўсім адрэзку, можа, на балоце не патрэбны плот. Яны ведаюць усе сцежкі там (на мяжы - заўв. RuBaltic.Ru), важна ацаніць, дзе знаходзіцца горад, дарога і т. д. Тут можа спатрэбіцца дапамога спецыялістаў», - сказаў Кашчунас, дадаўшы, што «падняты» на барацьбу з мігрантамі робат і ўсталяваныя цеплавізары давялі сваю эфектыўнасць.

Раней МУС Літвы папрасіла выдзеліць на ахову мяжы з Беларуссю 11,5 млн еўраў.