NATO: У нашых інтарэсах - дэмакратычная і суверэнная Беларусь
11- 14.06.2021, 21:48
- 7,800
Краіны NATO заклікалі таксама неадкладна вызваліць усіх палітвязняў.
NATO занепакоенае сітуацыяй у Беларусі і заклікае беларускія ўлады выконваць міжнародныя законы і вызваліць палітвязняў.
Пра гэта гаворыцца ў камюніке альянсу, апублікаваным паводле вынікаў саміту NATO 14 чэрвеня ў Брусэлі.
«Палітыка і дзеянні Беларусі маюць наступствы для рэгіянальнай стабільнасці і парушаюць прынцыпы, якія ляжаць у аснове нашага партнёрства», - гаворыцца ў дакуменце. NATO працягне сачыць за сітуацыяй для бяспекі альянсу, заявілі лідары краін NATO.
У NATO назвалі інцыдэнт з самалётам у Менску непрымальным і падтрымалі правядзенне міжнародных расследаванняў.
«Мы падтрымліваем правядзенне незалежных расследаванняў, у тым ліку Міжнароднай арганізацыяй грамадзянскай авіяцыі (ІКАО). Мы падтрымліваем захады, прынятыя краінамі NATO індывідуальна і калектыўна ў адказ на гэтае здарэнне», - гаворыцца ў заяве.
NATO таксама заклікае беларускія ўлады выконваць міжнародныя законы, правы чалавека і фундаментальныя свабоды і неадкладна вызваліць усіх палітвязняў, у тым ліку прадстаўнікоў польскай меншасці.
«Дэмакратычная, суверэнная і стабільная Беларусь - у нашых агульных інтарэсах. Краіны NATO па-ранейшаму гатовыя да ўзаемавыгаднага партнёрства паміж NATO і Беларуссю, з улікам палітычнай абстаноўкі і ўмоў бяспекі», - заяўляе NATO.
У камюніке гаворыцца, што альянс будзе сачыць за вучэннямі «Захад-2021» і заклікае Расею і Беларусь дзейнічаць прадказальна і празрыста ў адпаведнасці са ўзятымі на сябе абавязаннямі ў рамках АБСЕ.