Святлана Алексіевіч узнагароджаная адной з найвышэйшых узнагарод Нямеччыны

Ордэн Нобелеўскай лаўрэатцы ўручыў прэзідэнт ФРГ Франк-Вальтэр Штайнмаер.

Беларуская пісьменніца Святлана Алексіевіч узнагароджаная ордэнам «За заслугі перад Федэратыўнай Рэспублікай Германіяй». Вялікі крыж 1-й ступені яна атрымала з рук прэзідэнта ФРГ Франка-Вальтэра Штайнмаера (Frank-Walter Steinmeier). Урачыстая цырымонія прайшла ў аўторак, 15 чэрвеня, у Берліне, у палацы Бельвю - афіцыйнай рэзідэнцыі кіраўніка дзяржавы, паведамляе dw.com.

Ордэн быў заснаваны ў ФРГ у пачатку 1950-х. Адну з найвышэйшых узнагарод Нямеччыны ўручае федэральны прэзідэнт.

У 2014 годзе Святлана Алексіевіч атрымала Афіцэрскі крыж ордэна Мастацтваў і літаратуры - ведамасную ўзнагароду Францыі, а годам пазней стала лаўрэаткай Нобелеўскай прэміі ў літаратуры.

Алексіевіч: Беларусы выйшлі са стану спячкі

Штайнмаер у сваёй прамове закрануў шматмесячныя пратэсты ў Беларусі. «Жаночы твар у гэтага мірнага, адважнага і ўсё яшчэ жорстка прыглушанага імкнення да будучыні», - падкрэсліў кіраўнік дзяржавы.

Алексіевіч у прамове ў адказ адзначыла, што «камунізм яшчэ не мёртвы і гатовы даць апошні бой», мяркуючы з падзей ва Украіне, Беларусі і Расеі. Гэты лад «жыве не толькі ў галовах Пуціна ці Лукашэнкі», і з гэтым, «нягледзячы на наш ідэалізм, трэба лічыцца», дадала яна.

Пісьменніца назвала цяперашнюю эпоху «ліхой гадзінай». «Толькі ў дваццатым годзе мы атрэсліся ад гэтага сну», - адзначыла Алексіевіч. Яна асабліва падкрэсліла неабходнасць працаваць з тымі беларусамі, хто ўсё яшчэ падтрымлівае ўладу. «Трэба тлумачыць ёй свет, сваю гісторыю. Трэба тлумачыць, што мы сталі нацыяй», - паказала пісьменніца.

Будучая кніга Алексіевіч - пра пратэсты супраць рэжыму Лукашэнкі

У ліку найбольш вядомых твораў пісьменніцы - мастацка-дакументальныя кнігі «У вайны не жаночы твар», «Цынкавыя хлопчыкі» і «Чарнобыльская малітва».

Новая кніга будзе прысвечаная масавым пратэстам супраць рэжыму Аляксандра Лукашэнкі, распачатым у жніўні 2020 года. Алексіевіч жыве ў Нямеччыне з верасня 2020 года паводле запрашэння Нямецкай службы акадэмічных абменаў DAAD.