Галоўны дырэктар Ryanair распавёў праўду аб захопе самалёта беларускімі ўладамі
64- 15.06.2021, 19:50
- 116,358
Хлусня беларускіх генералаў цалкам зняпраўджаная.
Галоўны выканаўчы дырэктар Ryanair Майкл О'Ліры ў аўторак распавёў пра інцыдэнт з рэйсам Афіны - Вільня ў брытанскім транспартным камітэце, паведамляе выданне The Irish Times. Tut.by прыводзіць вытрымкі з ягонай прамовы:
• адхіленне рэйса было «наўмысным парушэннем усіх міжнародных авіяцыйных правілаў»;
• беларускія дыспетчары паведамілі экіпажу, што яны атрымалі «рэальную пагрозу, што калі самалёт увойдзе ў паветраную прастору Літвы ці паспрабуе прызямліцца ў аэрапорце Вільні, то на борце выбухне бомба»;
• капітан «неаднаразова» прасіў даць адкрытую лінію сувязі з цэнтрам кіравання аперацыямі Ryanair у Варшаве, але яму сказалі, што той бок не адказвае, што «зусім не адпавядала рэчаіснасці»;
• на капітана моцна ціснулі, каб ён прызямліўся ў Менску;
• пасля пасадкі ў салон зайшлі «некалькі невядомых асобаў з відэакамерамі», якія «неаднаразова спрабавалі прымусіць экіпаж сказаць на відэа, што яны добраахвотна накіраваліся ў Менск», але экіпаж адмовіўся зрабіць гэта.
Нагадаем, даклад ICAO аб інцыдэнце з самалётам кампаніі, у выніку якога былі затрыманыя Раман Пратасевіч і Сафія Сапега, абяцаюць прадставіць ужо ў найбліжэйшыя два тыдні.
Кіраўнік Ryanair Майкл О'Ліры таксама нагадаў аб трох невядомых пасажырах рэйса Афіны-Вільня, якія зніклі да таго, як прымусова пасаджаны ў Менску лайнер зноўку ўзляцеў:
- Ад органаў бяспекі нам вядома, што, хутчэй за ўсё, гэтыя трое былі кімсьці накшталт супрацоўнікаў КДБ. Ці быў гэта расейскі ці беларускі КДБ, мы не ведаем, і мы не ўпэўненыя, ці ёсць вялікая розніца.