Колькі грошай выслалі на радзіму беларусы з Расеі

Сярэдні чэк пералічэнняў склаў 391 даляр.

У першым квартале гэтага года агульная сума пералічэнняў фізічнымі асобамі-нерэзідэнтамі Расеі грашовых сродкаў у Беларусь практычна захавалася на ўзроўні канца 2020 года, піша «Заўтра тваёй краіны».

Паводле статыстыкі, апублікаванай у сярэдзіне чэрвеня Цэнтрабанкам Расеі, у рамках так званых транспамежных пералічэнняў фізічных асоб (з адкрыццём і без адкрыцця рахункаў праз крэдытныя арганізацыі і аплатныя сістэмы) з Расеі ў Беларусь ад нерэзідэнтаў паступіла 12 млн даляраў.

Сярэдні чэк пералічэнняў склаў 391 даляр. Паказаныя сума пералічэнняў практычна роўная той, якую беларускія атрымальнікі мелі на руках у чацвёртым квартале мінулага года.

2020 год праз наступствы пандэміі быў адным з самых складаных для беларусаў, якія працуюць у Расеі. У дакрызісным 2019 года сума іх пералічэнняў на радзіму вагалася ад 14 млн да 17 млн даляраў за квартал. У першым квартале 2020 года сума пералічэнняў скарацілася да 10,9 млн даляраў, а ў другім, калі ў Расеі быў аб'яўлены часовы локдаўн, звалілася да гістарычнага мінімуму на 8,59 млн даляраў. З трэцяга квартала патокі пачалі нарастаць - нерэзідэнты пералічылі ў Беларусь 10,7 млн даляраў. У чацвёртым, пераднавагоднім квартале аб'ёмы пералічэнняў дасягнулі сумы 12,8 млн даляраў.

Усяго ў першым квартале 2021 года ў Беларусь было пералічана 59 млн даляраў. Прыкладна такая сума была зафіксаваная ў першым квартале 2020 года, хоць у чацвёртым квартале мінулага года яна дасягала 66 млн даляраў.

Агульны аб'ём пералічэнняў на радзіму нерэзідэнтаў іншых краін, якія працуюць у Расеі, склаў 1 544 млн даляраў. Ён прыкладна роўны паказчыку першага квартала 2020 года, але больш чым на 300 млн даляраў саступае чацвёртаму кварталу мінулага года.

З гэтай сумы больш за 1 млрд даляраў прыпадае на грашовыя пералічэнні на радзіму прадстаўнікоў краін СНД і Украіны. Лідарамі сталі грамадзяне Узбекістана (498 млн даляраў), Таджыкістана (233 млн даляраў) і Кыргызстана (157 млн даляраў). Больш, чым беларусы, дадому адправілі грошай таксама азербайджанцы, армяне, украінцы, казахстанцы і малдаване.