Славаччына згортвае вакцынацыю «Спадарожнікам V» праз нізкі попыт

У паловы закупленых доз у канцы чэрвеня мінае тэрмін прыдатнасці.

Славаччына спыніць рэгістрацыю на вакцынацыю расейскім прэпаратам «Спадарожнік V» праз нізкі попыт, паведамляе Novinky.

Закупіўшы 200 тысяч ампул вакцыны (на 100 тысяч чалавек), распрацаванай цэнтрам імя Гамалеі, улады атрымалі толькі 10 тысяч заявак ад славакаў, якія жадаюць прышчапіцца.

У паловы доз у канцы чэрвеня мінае тэрмін прыдатнасці, і Славаччына паспрабуе перапрадаць або падарыць вакцыну іншым краінам, паведаміў кіраўнік Міністэрства аховы здароўя Уладзімір Лянгварскі.

З ягоных слоў, пакупнікамі незапатрабаваных у Славаччыне вакцын могуць стаць заходнебалканскія краіны, якія праяўляюць «вялікую цікавасць» да расейскага прэпарата.

Урад даў папярэднюю згоду на тое, каб пазбавіцца ад лішніх вакцын, афіцыйна пастанова можа быць зацверджаная на наступным тыдні, паведаміў Лянгварскі.

Са слоў міністра, каб павысіць цікавасць да вакцынацыі, улады запусцяць латарэю. На сёння ў Славаччыне цалкам прышчэпленыя 1,2 мільёна чалавек, яшчэ 700 тысяч атрымалі адзін укол і чакаюць другога.

Славаччына ў сакавіку імпартавала «Спадарожнік V», што справакавала палітычны скандал і прывяло да адстаўкі прэм'ер Ігара Матавіча.

Адабрэнне для масавай вакцынацыі «Спадарожнік» атрымаў у канцы траўня.

Цяпер расейская вакцына, якая, са слоў прэзідэнта Уладзіміра Пуціна, «надзейная, як аўтамат Калашнікава» і з'яўляецца «найлепшай у свеце», не мае адабрэння ад САЗ і Еўрапейскага агенцтва лекавых сродкаў (EMA).

Крыніцы Reuters сцвярджаюць, што рэгістрацыя ў Еўразвязе можа быць адкладзеная да канца года, бо неабходныя звесткі клінічных выпрабаванняў не былі пададзеныя своечасова.

У РФПІ заявілі, што гэтая інфармацыя не адпавядае рэчаіснасці, а «спекуляцыі з боку прэсы запавольваюць працэс рэгістрацыі».

«Усе звесткі аб клінічных выпрабаваннях «Спадарожніка V» былі пададзеныя, інспекцыя GCP (good clinical practice, належная клінічная практыка) скончаная і паводле яе вынікаў ад Еўрапейскага агенцтва лекавых сродкаў (EMA, European Medicines Agency) быў атрыманы пазітыўны водгук», - падкрэслілі ў РФПІ.