Еўрадэпутаты заклікалі Барэля запатрабаваць неадкладнага вызвалення Севярынца, Афнагеля і актывістаў «Еўрапейскай Беларусі»

Ініцыятарам звароту выступіў парламентарый са Славаччыны Іван Штэфанец.

Еўрадэпутаты заклікалі кіраўніка дыпламатыі ЕЗ праявіць салідарнасць з актывістамі «Еўрапейскай Беларусі». Афіцыйны ліст з заклікам адрэагаваць на прысуд Паўлу Севярынцу і актывістам «Еўрапейскай Беларусі» адрасаваны Вярхоўнаму прадстаўніку ЕЗ у замежных справах і палітыцы бяспекі Жазэпу Барэлю.

Копія ліста маецца ў распараджэнні рэдакцыі сайта Charter97.org. Ініцыятарам звароту выступіў парламентарый са Славаччыны Іван Штэфанец. Ініцыятыву падтрымалі былы прэм'ер-міністр Літвы Андрус Кубілюс і былы міністр замежных спраў Польшчы Радаслаў Сікорскі. Усяго пад зваротам падпісаліся 26 дэпутатаў Еўрапейскага парламента.

Публікуем поўны тэкст ліста еўрадэпутатаў Жазэпу Барэлю.

- Мы, падпісаныя ніжэй чальцы Еўрапейскага парламента, звяртаемся да вас з просьбай надаць падвышаную ўвагу прадэмакратычным зняволеным у Беларусі. Глыбока паважаючы ўсіх жанчын і мужчын, якія здольныя супрацьстаяць аўтарытарнаму праўленню, немагчыма прыняць тое, што беларуская апазіцыя зазнае такія пакуты. Мы спадзяемся, што нашы дзеянні ў Еўрапейскім Звязе змогуць паўплываць на тое, з якім зваротам сутыкаюцца канкрэтныя палітвязні.

Мы просім вас запатрабаваць неадкладнага вызвалення лідараў апазіцыі, актывістаў і блогераў:

Паўла Севярынца, сустаршыню арганізацыйнага камітэта партыі «Беларуская хрысціянская дэмакратыя»,

Ірыны Шчаснай, грамадзянскай актывісткі,

Максіма Вінярскага, актывіста грамадзянскай кампаніі «Еўрапейская Беларусь»,

Яўгена Афнагеля, актывіста грамадзянскай кампаніі «Еўрапейская Беларусь»,

Андрэя Войніча, актывіста грамадзянскай кампаніі «Еўрапейская Беларусь»,

Паўла Юхневіча, актывіста грамадзянскай кампаніі «Еўрапейская Беларусь»,

Змітра Казлова, актывіста грамадзянскай кампаніі «Еўрапейская Беларусь».

Яны былі прысуджаныя да пазбаўлення волі на тэрміны ад чатырох да сямі гадоў Магілёўскім абласным судом 25 траўня 2021 года. Працэс праходзіў за зачыненымі дзвярыма, без прысутнасці прадстаўнікоў грамадскасці, СМІ і блізкіх сваякоў!

Еўразвязу неабходна праявіць салідарнасць з гэтымі адважнымі беларускімі грамадзянамі. Такія злачынствы не могуць заставацца беспакаранымі і незаўважанымі. Паводзіны беларускага рэжыму ў дачыненні да гэтых ні ў чым не вінаватых людзей не могуць заставацца па-за ўвагай. Гэты акт патрабуе рэакцыі, і Еўрапейскі Звяз павінен даць выразны сігнал аб тым, што ён не пацерпіць такіх паводзін.

Нагадаем, што 25 траўня суддзя Ірына Ланчава прысудзіла сустаршыню партыі «Беларуская хрысціянская дэмакратыя» Паўла Севярынца, а таксама ўдзельнікаў грамадзянскай кампаніі «Еўрапейская Беларусь» Яўгена Афнагеля і Андрэя Войніча да 7 гадоў калоніі ўзмоцненага рэжыму. Да 5 гадоў калоніі ўзмоцненага рэжыму прыгавораны актывіст «Еўрапейскай Беларусі Максім Вінярскі і вядоўца YouTube-канала «Шэры кот» Зміцер Казлоў. Рэдактарка тэлеграм-канала «Мая краіна Беларусь» Ірына Шчасная асуджаная на 4 гады калоніі агульнага рэжыму.