25 лiпеня 2021, Нядзеля, 21:57
Сім сім, Хартыя 97!
Рубрыкі

Эксперты расказалі, чаму Пуцін мог сам прапанаваць Байдэну патаргавацца пра лёс Лукашэнкі

18
Эксперты расказалі, чаму Пуцін мог сам прапанаваць Байдэну патаргавацца пра лёс Лукашэнкі
ФОТА: ТАСС

Тры меркаванні.

Вынікі сустрэчы прэзідэнта ЗША Джозэфа Байдэна і кіраўніка РФ Уладзіміра Пуціна сталі тэмай нумар 1 сярод экспертаў. І нават той факт, што Беларусь там згадалі толькі мімаходзь, амаль нікога з іх не бянтэжыць. Вось чаму, піша telegraf.by.

Аналітык Ігар Ільяш упэўнены, што «сустрэча Пуціна і Байдэна мела вельмі не спадабацца Лукашэнку».

«... Гэта значыць, ніякіх дамоўленасцяў з нагоды Беларусі дасягнута не было і наўрад у Жэнэве іх спрабавалі шукаць. Але падобна, што далейшы лёс Лукашэнкі не быў уключаны Пуціным у пералік нейкіх "чырвоных ліній". Пуцін пакідае дзверцы ў беларускім пытанні прачыненымі - ва ўсякім разе, так гэта цяпер выглядае з боку», - уважае эксперт.

«Гэткая няпэўнасць не можа не палохаць Лукашэнку, асабліва ўлічваючы ягоную павышаную падазронасць. Нагадаю: кагадзе Лукашэнка, фактычна, абвінаваціў Байдэна ў намеры яго забіць і зладзіць вайсковы пераварот. І Пуцін дэ-факта падтрымаў гэтую версію публічна. Але цяпер гэтыя людзі цалкам спакойна абмяркоўваюць Лукашэнку за ягонай спінай. Правакацыйная расстаноўка сіл для свядомасці чалавека, схільнага верыць у самыя неймаверныя тэорыі змоў», - нагадаў Ігар Ільяш у сваім ТГ-канале.

«Што гэта будзе азначаць на практыцы? Улада будзе яшчэ мацней нэрвавацца, а значыць - рабіць новыя памылкі. Думаю, у наступныя тыдні нас чакае шмат цікавага», - прагназуе аналітык.

У сваю чаргу, палітолаг Валерый Карбалевіч упэўнены, што для ЗША Беларусь не стаіць у спісе прыярытэтаў. А значыць і шмат часу Джо Байдэн беларускаму крызісу надаваць не мерыцца. Дый кіраўнік Крамля напраўду не мае тых магчымасцяў уплыву, як кажуць расейскія СМІ.

«А ці здольны быў бы Пуцін у прынцыпе развязаць «беларускае пытанне», нават калі б ён пра гэта дамовіўся з Байдэнам? Той кароткі перыяд (жнівень-верасень 2020 года), калі расейскі прэзідэнт сапраўды мог паспрыяць адыходу Лукашэнкі, даўно прайшоў. Тое, што Пуціну нібыта дастаткова захацець, і ён скіне Лукашэнку, - гэта міф, які распаўсюджваецца расейскімі экспертамі , - піша Валерый Карбалевіч.

«Напраўду крамлёўскі ўладар не змог абараніць газпромаўскі банк на тэрыторыі Беларусі ад рэйдэрскага захопу, не мог дамагчыся вызвалення вагнэраўцаў, пакуль не змянілася сітуацыя. Цяпер не можа выбавіць з беларускай турмы расейскую грамадзянку Соф'ю Сапегу, затрыманую разам з Раманам Пратасевічам», - пералічыў аглядальнік хібы прэзідэнта РФ.

«Адзінае, што магло адбыцца ў беларускай справе падчас саміту ў Жэнэве, гэта абмен думкамі, пазіцыямі, магчыма, асцярогамі. Таму, мяркую, вялікія спадзяванні адных, як і вялікія асцярогі другіх - дарэмныя», - упэўнены Валерый Карбалевіч.

А аглядальнік Пётр Кузняцоў упэўнены, што на перамовы Байдэна і Пуціна абавязкова трэба глядзець у кантэксце таго, што адбылося ў гэты ж дзень. Нагадаем, што ўдзельнікі кантраляванага Расеяй «ЛНР» падзякавалі Аляксандру Лукашэнку за доступ да Рамана Пратасевіча.

«Дык вось, тое, што менавіта сёння «ЛНР» зрабіла такую заяву - гэта нават не «падстаўленне». Гэта пацверджанне таго, пра што я пісаў неаднаразова, пачынаючы з моманту інцыдэнту з Rynair: у новай сітуацыі праблема Беларусі - гэта вялікае і сур'ёзнае пытанне міжнароднага парадку дня, і немінуча стане аб’ектам торгу паміж Расеяй і Захадам, праз тое, што цана развязання пытання для захаду моцна ўзрасла», - піша ў сваім ТГ-канале аглядальнік.

«Тое, што адбылося сёння - прыём, які Расея ўжо неаднаразова ўжывала ў розных тыпах, варыянтах і сітуацыях. Павышэнне ставак па меры таргоў», - упэўнены Пётр Кузняцоў, нагадаўшы, як расеійскія войскі штурмавалі Дэбальцава проста падчас перамоў Парашэнкі ды Пуціна ў Менску.

«Маштабы, вядома, розныя, і вастрыня - розная, а вось існасць адна. У адказ на жаданне Захаду неяк развязаць беларускую праблему (нават калі сёння Пуцін з Байдэнам няшмат часу прысвяцілі яе абмеркаванню, як мінімум, пытанне было пазначанае, а напярэдадні з заявай выступілі супольна ЗША і ЕЗ, так што пытанне будзе разглядацца на больш тэхнічным узроўні ўжо пасля таго, як на самым вышэйшым узроўні будуць пазначаныя рамкі), Масква падкідвае паліва ў кацёл: глядзіце, ён жа яшчэ і з сэпаратыстамі такія справы вядзе! Што вы на гэта скажаце? Тавар у нас што трэба - танна не аддамо», - уважае аналітык.

«Са жніўня мінулага года з Менска толькі і чуліся стогны з нагоды таго, маўляў, што вакол Беларусі ідзе геапалітычная гульня. Якой, гульнёй, тады і не надта пахла. Захаду ўсякія выбухі нестабільнасці ў рэгіёне - як сярпом па тым жа месцы, якое некаторыя хацелі б у кагосьці бачыць сталёвым. Таму да самага апошняга моманту ён абазначаў сваю зацікаўленасць у пытанні вельмі ўмоўна - заявамі, заклапочанасцю і спрэс сымбалічнымі санкцыямі», - мяркуе Пётр Кузняцоў.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».