Што здарылася ўвечары з электрычнасцю ў Беларусі?
16- 24.06.2021, 8:03
- 28,332
Жыхары розных гарадоў паведамілі пра «камунальны калапс».
Учора ўвечары ў многіх гарадах Беларусі знікла электрычнасць. Партал tut.by паспрабаваў разабрацца, з чым гэта магло быць звязана.
У Магілёўскай вобласці амаль гадзіну не было электрычнасці. Мяркуючы з паведамленняў чытачоў, электрычнасць знікла ў мностве дамоў, таксама ў кранах не было вады. У цемры апынуліся цэлыя раёны, на дарогах некаторы час не працавалі святлафоры.
Прычынай стаў пажар на Лукомльскай ГРЭС у Віцебскай вобласці. Калі дакладна – здарылася загаранне трансфарматара напружання. Супрацоўнікі МНС ліквідавалі загаранне, ад агню ніхто не пацярпеў. Электразабеспячэнне ў галіне паступова аднавілі (да гэтага моманту – пакуль не ўсюды).
У гэты час у менскай Серабранцы таксама знікла электрычнасць. Пра сувязь гэтага з пажарам на ГРЭС звестак няма. Пазней у дамы менчукоў электрычнасць вярнулася (да моманту публікацыі – не ва ўсе, ёсць паведамленні чытачоў пра адсутнасць электрычнасці ў Менску і Магілёве, а таксама вады ў Оршы).