Прыбыткі Расеі ад продажу нафты ўпалі

Здабыча нафты ў РФ таксама скарацілася.

Прыбыткі Расеі ад экспарту нафты ў студзені – красавіку ўпалі на 10,9 адсотка ў параўнанні з аналагічным перыядам летась. Так, яны склалі 26,89 мільярда даляраў, вынікае са справаздачы Федэральнай мытнай службы (ФМС).

Фізічны аб'ём экспарту расейскай нафты знізіўся на 21,9 адсотка (да 67,016 мільёна тонаў). У красавіку ў параўнанні з сакавіком паказнік упаў на 22,9 адсотка ў грашовым (да 5,89 мільярда даляраў), а ў натуральным выразе продажы сыравіны знізіліся на 25,2 адсотка (да 13,54 мільёна тонаў).

Прыбытак ад экспарту бензіну скараціўся на 10,5 адсотка (да 996 мільёна даляраў). Аб'ёмы знізіліся на 11,5 адсотка (да 2,08 мільёна тонаў). Усяго прыбыткі кампаній ад экспарту нафтапрадуктаў зменшыліся на 0,2 адсотка (да 20 мільярдаў даляраў).

Sakhalin Energy і «Ямал СПГ» ад экспарту звадкаванага прыроднага газу атрымалі 1,887 мільярда даляраў (мінус 21,3 адсотка). Фізічны аб'ём вырас на 13,3 адсотка (да 22,9 мільёна кубаметраў).

Здабыча нафты ў Расеі скарацілася на 6,3 адсотка ў студзені – траўні ў гадавым вымярэнні (да 212,22 мільёна тонаў). Сярэднясутачная здабыча склала 10,3 мільёна бараляў.