Банкі не рызыкуюць крэдытаваць стратны аграсектар

Рост запазычанасці АПК перад банкамі практычна спыніўся.

На 1 траўня юрыдычныя асобы, якія ўваходзяць у АПК, паводле беларускай методыкі завінаваціліся банкам 7,339 млрд BYN у эквіваленце. Для параўнання: на 1 студзеня сума запазычанасці складала 7,375 млрд BYN. Можна сказаць, што ў 2021 годзе рост практычна спыніўся: банкі крэдытуюць АПК у межах выплат старых пазык, піша сайт banki24.by.

Асноўную суму крэдытаў адцягваюць на сябе вытворцы прадуктаў харчавання - 4,281 млрд BYN на 1 траўня. Таксама значныя завінавачанасці на справаздачную дату мелі жывёлагадоўля (1,169 млрд BYN) і змяшаная сельская гаспадарка (975,7 млн BYN).

Запазычанасць за крэдыты бывае каротка-і доўгатэрміновай. У першым выпадку гэта крэдыты, да выплаты якіх засталося менш за год, у другім - больш за год.

На 1 траўня сума кароткатэрміновай завінавачанасці АПК склала 3,168 млрд BYN, доўгатэрміновых - 4,171 млрд BYN. У абодвух катэгорыях паводле сумы завінавачанасці лідары вытворцы прадуктаў харчавання - 2,173 і 2,108 млрд BYN адпаведна.

Загружанасць харчпрама крэдытамі тлумачыцца тым, што ў беларускай сістэме гэтыя прадпрыемствы з'яўляюцца асноўнымі цэнтрамі прыбытку ў АПК і, такім чынам, плацежаздольнымі кліентамі для банкаў. Фінансавы стан прадпрыемстваў сельскай гаспадаркі ў сярэднім горшы - блізу 56,5% стратных флагманаў без уліку дзяржаўнай падтрымкі ў 1 квартале.

Запазычанасць АПК перад банкамі мае мультывалютны характар (гэта значыць складаецца з некалькіх валют). На 1 траўня АПК назапасіў завінавачанасці ў беларускіх рублях на суму 5,512 млрд BYN. На 1 студзеня сума запазычанасці была роўная 5,483 млрд BYN.

Такім чынам, выдача новых крэдытаў для АПК адбывалася амаль выключна ў сумах выплаты старых. Такое становішча часта ўтвараецца, калі ў крэдытаванні павышаны рызыкі і банкі не хочуць браць на сябе зашмат.

Завінавачанасць за кароткатэрміновыя рублёвыя крэдыты склала 2,547 млрд BYN, за доўгатэрміновыя - 2,965 млрд BYN. У абодвух сегментах лідарам у суме ўзятых крэдытаў з'яўляецца харчпрам.

Сярод астатніх валют банкаўскага крэдытавання АПК рэгулятар выдае даляры, еўра і расейскія рублі. На 1 траўня запазычанасць у далярах дасягнула 197,1 млн USD, у еўрах - 258,4 млн EUR, у расейскіх рублях - 15,1 млрд RUB.

Ва ўсіх выпадках сума валютнай завінавачанасці альбо не вырасла (даляры і еўра), альбо скарацілася (расейскі рубель) да пачатку года. А вось у параўнанні з 1 траўня 2020 года адбылося падзенне запазычанасці ў еўрах, рост у расейскіх рублях і стабілізацыя ў даляры.