У палаце №6 дзень адчыненых дзвярэй
26- АНДРЭЙ САННІКАЎ
- 14.07.2021, 17:15
- 52,304
У Беларусі гэтаму гарачкаваму трызненню ўжо ніхто не верыць.
Што Лукашэнку сапраўды пакуль удаецца, дык гэта ўдаваць дурня на сустрэчах з Пуціным, і выстаўляць таго нейкім прыдуркаватым.
Вось сядзіць такі цар ўсяе Русі, карыфей усіх навук і аўтар фундаментальнай працы аб Украіне і выслухоўвае трызненні. Прычым аднатыпныя.
То там Нік з Майкам і Мэркель прызнаюцца Лукашэнку ў атручванні Навальнага, то Байдэн з літаратуразнаўцам і юрыстам рыхтуюцца забіць Лукашэнку - «хто ж цябе, Вова, тады зашчышчыт»? То хамас (з маленькай літары) шле тэлеграмы авіядыспетчару праз КДБ, то спячыя дыверсійныя суполкі прачынаюцца і айда языкі прапагандыстам рэзаць і індывідуальны тэрор ладзіць.
Не ведаю як у Расеі, выхаванай на Кашпіроўскім ды Жырыноўскім, а ў Беларусі гэтаму гарачкаваму трызненню ўжо ніхто не верыць. Даўно.
А Пуцін на шматмільённую аўдыторыю паказвае, што верыць, і толькі крэндзелі, якія ён кожны раз выпісвае нагамі, седзячы ў крэсле, становяцца ўсё больш мудрагелістымі.
Ці ўсё ж гэта ў ягоным разуменні трэба, каб Савецкі Саюз хутчэй надышоў?
Выслухаўшы апакаліптычную балбатню Лукашэнкі аб тым, што ўся Беларусь ператварылася ў дыверсантаў, якія з-за кожнага рога пагражаюць абаронцам цела дыктатара і яму самому, Пуцін звычайна прамаўляе што-небудзь накшталт таго: «Беларусь засталася для Расеі вялікім і надзейным партнёрам у сферы эканомікі». Або так: «Расея застаецца ключавым гандлёва-эканамічным партнёрам БелОРУССсии - мы назіраем значны рост тавараабарачэння». А то і зусім прыцісне: «У нас дзейнічаюць камісіі высокага ўзроўню, якія займаюцца гэтымі пытаннямі».
А потым грошай паабяцае і суцешыць сваім поўным разуменнем убогай нянавісці да Захаду, маўляў, сам такі.
Гэта што, сур'ёзна?
Гэта вось так проста: наплесці кашалёў і атрымаць за гэта грошы расейскіх падаткаплатнікаў?
Гэта вось так у ядзернай дзяржаве прымаюцца пастановы?
Відавочна, што ў палаце №6 дзень адчыненых дзвярэй.
Андрэй Саннікаў, «Фэйсбук»