У САЗ назвалі тэрміны заканчэння пандэміі COVID-19
7- 24.07.2021, 13:07
- 27,458
Кіраўнік арганізацыі агучыў і ўмовы дасягнення гэтай мэты.
У Сусветнай арганізацыі здароўя мяркуюць, што пандэмія каранавірусу не скончыцца прынамсі да сярэдзіны 2022 года, калі кожная краіна можа патэнцыйна вакцынаваць 70% свайго насельніцтва.
Пра гэта паведамляе Newsweek.
Кіраўнік САЗ Тэдрас Гебрэесус заявіў пра глабальную мэту – забяспечыць імунізацыю не менш як 10% насельніцтва кожнай краіны да верасня, 40% – да канца года і 70% – да сярэдзіны наступнага года.
«Гэта найважнейшыя этапы, якія мы павінны дасягнуць разам, каб спыніць пандэмію. Пандэмія скончыцца, калі свет пастановіць пакласці гэтаму канец, паколькі пастанова ў нашых руках», – сказаў ён.
Паводле словаў Гебрэесуса, для таго, каб вакцынаваць 70% насельніцтва кожнай краіны, трэба 11 млрд дозаў вакцынаў. Ён заклікаў багатыя краіны пачаць размяркоўваць прэпараты, а не назапашваць іх. У той самы час Гебрэесус мяркуе, што раўнамернае размеркаванне вакцынаў – гэта толькі кароткатэрміновая пастанова. На ягоную думку, у свеце трэба «рэзка павялічыць» іх вытворчасць, каб дапамагчы краінам з нізкім узроўнем прыбытку.
Паводле звестак САЗ, у свеце ад COVID-19 прышчэплена больш за два мільярды людзей – гэта прыкладна чацвёртая частка сусветнага насельніцтва і значна ніжэй за парог 70%, неабходны для дасягнення калектыўнага імунітэту.
Кіраўнік САЗ не выключае выцечку каранавірусу з лабараторыі ва Ухані
Эксперты ў галіне аховы здароўя адзначаюць, што нізкі ўзровень вакцынацыі ў пэўных раёнах свету дазваляе вірусу распаўсюджвацца і павялічвае магчымасць утварэння новых мутацый.
І хоць некаторыя прэпараты паказваюць эфектыўнасць супраць тых варыянтаў каранавірусу, якія існуюць цяпер, з павелічэннем новых штамаў ёсць верагоднасць, што супраць якога-небудзь з іх яны будуць неэфектыўныя. Паводле словаў Гебрэесуса, калі гэта адбудзецца, то давядзецца распрацоўваць новыя вакцыны і рэвакцынаваць увесь свет.
Цяпер у спісе САЗ ёсць такія штамы каранавірусу: Альфа (выяўлены ў Вялікай Брытаніі), Бэта (Паўднёвая Афрыка), Гама (Бразілія), Дэльта (Індыя), Гэта (упершыню зарэгістраваны ў Вялікай Брытаніі і Нігерыі), Ёта (ЗША), Капа (Індыя) і Лямбда (Перу).