Магутны тайфун «Іньфа» абрынуўся на Шанхай: відэа

Больш за 360 тысяч чалавек эвакуявалі.

Улады кітайскага мегаполіса Шанхай праз тайфун «Іньфа» («Феерверк») эвакуявалі з прыбярэжных раёнаў звыш 360 тысяч чалавек. Пра гэта паведаміла ў нядзелю агенцтва «Сіньхуа», піша ТАСС.

Цяпер хуткасць ветру ў новым раёне Пудун, які прыняў на сябе асноўны ўдар стыхіі, дасягае часам 24 м/с. З самай раніцы ўвесь горад знаходзіцца ва ўладзе шквалістага ветру і моцных ліўняў. Экстранныя службы пераведзеныя на асаблівы рэжым працы ў сувязі з частымі выпадкамі абрыву правадоў, падзення рэкламных шчытоў, галінак, саміх дрэў і нават ліхтарных слупоў. Звестак аб пацярпелых пакуль не паступала.

У аэрапортах Шанхая часова скасаваныя ўсе рэйсы. Да 12:00 паводле мясцовага часу (07:00 па Менску) 26 ліпеня прыпынены рух хуткасных цягнікоў, якія ідуць у горад і з яго. Улады таксама загадалі скасаваць у панядзелак заняткі ва ўсіх адукацыйных установах мегаполіса і дзіцячых садках.

«Іньфа» стаў шостым тайфунам у гэтым сезоне. У нядзелю раніцай ён нанёс удар па групе астравоў Чжоўшань (усходняя правінцыя Чжэцзяня), а затым прадоўжыў рух усцяж узбярэжжа ў паўночна-заходнім кірунку. Хуткасць ветру ў цэнтральнай частцы тайфуну цяпер дасягае 38 м/с. Паводле прагнозаў метэаролагаў, у нядзелю ўвечары ці панядзелак уранку ён абрынецца на ўзбярэжжы Чжэцзян у раёне горада Цзясіна, а таксама дабярэцца да Пудуна, дзе абвешчаны аранжавы ўзровень небяспекі.

У Чжэцзяне ўлады раней эвакуявалі з патэнцыйна небяспечных раёнаў блізу 100 тысяч чалавек. Некалькі тысяч рыбалавецкіх суднаў схаваліся ў партах. Праз штармавы вецер і моцныя хвалі ў прыбярэжных раёнах Чжэцзяня, а таксама ў Шанхаі спыненая праца ўсіх турыстычных аб'ектаў, паркаў і іншых славутасцяў. Скасаваныя ўсе рэйсы ў аэрапортах такіх гарадоў, як Ханчжоў, Нінбо і Чжоўшань, часова прыпынены рух цягнікоў у шэрагу накірункаў у рэгіёне.

У Кітаі дзейнічае чатырохузроўневая сістэма папярэджання насельніцтва аб стыхійных бедствах, якая ўключае сіні, жоўты, аранжавы і чырвоны колеры.