У Беларусі святкуюць адну з найвялікшых перамог нашых продкаў
5- 25.07.2021, 19:46
- 11,800
У «Дудутках» праходзіць двухдзённы рыцарскі фэст «Наш Грунвальд».
Пад Менскам на тэрыторыі музейнага комплексу «Дудуткі» 24-25 ліпеня праходзіць двухдзённы рыцарскі фэст «Наш Грунвальд». Ён праводзіцца ў гонар перамогі аб'яднаных войскаў ВКЛ і Каралеўства Польскага над рыцарамі Тэўтонскага ордэна ў бітве пад Грунвальдам 15 ліпеня 1410 года. Гэтая перамога хаўрусных войскаў спыніла канчаткова крыжацкую агрэсію на нашы землі. Атмасфера першага дня мерапрыемства ў фотарэпартажы «Белсата».
У двухдзённым фестывалі бяруць удзел клубы гістарычнай рэканструкцыі з усёй Беларусі. На імправізаваным рысталішчы цягам усяго першага дня прадстаўнікі клубаў - сярэднявечныя рыцары паказваюць сваё вайсковае майстэрства і моц падчас двубояў, баёў «пяцёрак» і бугурты (масавых спражэнняў). Бой цягнецца да таго моманту, пакуль праціўнік не падае на зямлю. Прысутныя на полі суддзі вызначаюць, хто з рыцараў перамог.
На кірмашы можна было набыць у рамеснікаў скураныя сумкі і гаманцы, ільняную вопратку, плеценыя паясы, драўляныя нажы і мячы.
Ахвотных выкаваць металічныя вырабы запрашалі да сябе ў імправізаваную майстэрню кавалі, прадказаць будучыню браліся варажбіткі і аракулы.
Сапраўднымі рыцарамі-хэдлайнерамі былі чальцы Маладзечанскага клуба гістарычнай рэканструкцыі «Шатландская пяхота». Падчас свята яны дэманстравалі гасцям розныя тыпы сярэднявечнай зброі: кнотавыя вогнестрэлы, кісцяні, розных тыпаў сякеры і мячы. За пяць рублёў можна было апрануць пяхотную кірасу, шлем, футравую накідку, патрымаць у руках сякеру ці меч. Дазвалялі рыцары і зрабіць адзін стрэл з кнотавай стрэльбы 16-17ст. (Бамбардзье, пістоль). Праўда, прысутным даводзілася затыкаць вушы ад вельмі гучнага стрэлу. Рыцары-рэканструктары тлумачылі, што гэта зброя выкарыстоўвалася ў баі не столькі для паразы ворага, колькі мела псіхалагічны эфект: палохала коней, пяхоту.
Шатландскія пяхотнікі апынуліся і выдатнымі перформерамі. Падчас свайго выступу яны разыгралі некалькі рыцарскіх, шатландскіх, рамантычных легенд пра адважных воінаў, якія дзеля каханай здзяйснялі ваенныя подзвігі, нават коштам уласнага жыцця.
Кульмінацыяй першага дня фэсту стала рэканструкцыя Грунвальдскай бітвы. Рэшткі разгромленых тэўтонцаў ратаваліся ўцёкамі ў сваім абозе за драўлянымі шчытамі, дзе былі атакаваныя саюзнымі войскамі, пераможаныя, забітыя або ўзятыя ў палон.
Першы фестывальны дзень скончыўся выступамі музычных гуртоў, якія ў розных стылях - ад фолку да року - выконвалі сярэднявечную музыку. На сцэне запальвалі - гурт «Pawa», «Млын», «Неўрыда», «Стокс», «Aquamorta». Танцпол не трэба было доўга разаграваць, даслоўна з першай кампазіцыі ўсе пусціліся ў скокі ў карагодзе, групах і сола.
Сёння фестываль прадоўжыцца. Цікавосткай другога дня будуць рыцарскія баі на конях і спаборніцтвы лучнікаў.