Загадкавая смерць расейскага міністра: Названая прычына ягонай гібелі
- 25.07.2021, 18:56
- 31,364
Міністру было 39 гадоў.
24 ліпеня ў лякарні памёр міністр сувязі і лічбавага развіцця Амурскай вобласці Аляксандр Курдзюкоў. Яму было 39 гадоў. У СМІ з'явілася інфармацыя пра прычыну ягонай смерці. Пра гэта піша «Апостраф» са спасылкай на тelegram-канал LIFESHOT.
Курдзюкоў трапіў у лякарню пасля таго, як пабіўся падчас адпачынку на турбазе з майстрам спорту ў паўэрліфтынгу.
Прычынай канфлікту стала грубае выказванне з боку спартоўца на адрас жонкі Курдзюкова. Са словаў сварка перарасла ў бойку, падчас якой паўэрліфтар моцна збіў чыноўніка. З 22 ліпеня ён знаходзіўся ў медыкаментознай коме. Медыкі не здолелі яго выратаваць. 24 ліпеня арганізм Курдзюкова не вытрымаў і ён памёр.
"Учора ўвечары памёр Аляксандр Міхайлавіч Курдзюкоў. Светлая памяць. Адышоў вельмі рана", – напісаў у Instagram губернатар рэгіёну Васіль Арлоў.
Мясцовымі праваахоўнікамі ўжо распачатая крымінальная справа паводле артыкула "Наўмыснае прычыненне цяжкай шкоды здароўю".
Паводле звестак LIFESHOT, судова-медыцынская экспертыза нібыта паказала, што Аляксандр Курдзюкоў памёр ад траўмы, якую ён атрымаў у выніку ўдару пры падзенні.
На гэты момант майстар спорту ў паўэрліфтынгу Аляксей Шкарын, з якім пабіўся чыноўнік, праходзіць паводле справы як сведка. Паводле ягоных словаў, міністр упаў сам.
Пазней стала вядома, што 39-гадовы паўэрліфтар Аляксей Шкарын, пасля канфлікту з якім памёр міністр Курдзюкоў, затрыманы. Цяпер ён дастаўлены на допыт у Следчы камітэт.