ЗША і яшчэ 20 краін падтрымалі пратэсты на Кубе

Раней Амерыка ўвяла санкцыі супраць некаторых кіраўнікоў кубінскіх сілавых структур.

Кіраўнікі дыпламатычных структур ЗША і 20 іншых краін выступілі ў панядзелак з асуджэннем масавых арыштаў на Кубе і заклікалі ўлады выспы цалкам аднавіць доступ жыхароў краіны да інтэрнэту, паведамляе «Голас Амерыкі».

Разам з ЗША супольную заяву на гэты конт падпісалі Аўстрыя, Бразілія, Калумбія, Харватыя, Кіпр, Чэхія, Эквадор, Эстонія, Гватэмала, Грэцыя, Гандурас, Ізраіль, Латвія, Літва, Косава, Чарнагорыя, Паўночная Македонія, Польшча, Рэспубліка Карэя і Украіна.

«Дэмакратыі ўсяго свету адзіныя ў падтрымцы кубінскага народа і заклікаюць урад Кубы паважаць патрабаванні кубінцаў і ўніверсальныя правы чалавека», - заявіў дзяржсакратар ЗША Энтані Блінкен.

Нагадаем, што на мінулым тыдні ЗША ўвялі санкцыі супраць некаторых кіраўнікоў кубінскіх службаў бяспекі за парушэнні правоў чалавека падчас падаўлення антыўрадавых пратэстных выступаў.

Сярод прычын пратэстаў на Кубе - эканамічны крызіс у краіне, дзеянні ўладаў ва ўмовах пандэміі каранавіруса і парушэнне правоў чалавека.