У Петрыкаўскім раёне гараць тарфянікі
- 26.07.2021, 16:31
- 3,640
Плошча пажару - больш за сто футбольных палёў.
Тарфяной пажар разгарэўся недалёка ад вёскі Бобрыка ў Петрыкаўскім раёне, паведамляе zerkalo.io са спасылкай на МНС.
Плошча пажару складае 85 гектараў - гэта прыкладна 120 футбольных палёў. Слуп дыму бачны практычна з кожнага пункта раёна. У ліквідацыі ўзгарання ўдзельнічаюць ратавальнікі, леснікі, працаўнікі сельгасарганізацый.
У МНС адзначаюць, што тушэнне ўскладняецца недахопам вады, гарачым надвор'ем, моцнымі парывамі ветру, які спрыяе хуткаму распаўсюджванню агню.
- Сярод нашых галоўных і першарадных задач - гэта не дапусціць распаўсюджвання гарэння на найбліжэйшы населены пункт Бобрык і на астатнія часткі сельскагаспадарчага поля, - адзначыў намеснік начальніка Гомельскай абласной управы МНС Уладзімір Клабук.
Для кантролю распаўсюджвання агню арганізаваны аблёт месцаў узгарання верталётам МІ-2. Эвакуацыя жыхароў найбліжэйшых населеных пунктаў не патрабуецца.