Менскія забудоўнікі рыхтуюцца да падзення рынку і дэвальвацыі

Будаўніцтва жылля ў сталіцы паскараецца.

Сталічныя забудоўнікі спяшаюцца пабудаваць і прадаць кватэры, баючыся падзення рынку нерухомасці і дэвальвацыі, таму павялічылі будаўніцтва жылля ў Менску ў студзені – чэрвені 2021 года на 60,1%, паведамляе select.by.

Паводле выніках студзеня – траўня 2021 года прырост складаў 45,8%, гэта значыць у чэрвені здача кватэраў паскорылася. Усяго за паўгоддзе ў Менску ўведзена ў эксплуатацыю 440,1 тыс. квадратных метраў жылля.

Нічога падобнага ў іншых рэгіёнах Беларусі не назіраецца. На другім месцы ў тэмпах росту будаўніцтва знаходзіцца Гарадзенская вобласць, у якой уведзена ў эксплуатацыю ў студзені – чэрвені 225,2 тыс. квадратных метраў жылля, што перавысіла паказнік аналагічнага перыяду мінулага года толькі на 15%.

Усяго ў Беларусі за студзень – чэрвень гэтага года пабудавалі 23,9 тыс. новых кватэраў, што адпавядае ўвядзенню ў эксплуатацыю 2 040,6 тыс. квадратных метраў агульнай плошчы жылля.

Для чаргавікоў пабудавана 866,4 тыс. квадратных метраў, то-бок 42,5% ад агульнага аб'ёму. З іх з дзяржаўнай падтрымкай узведзена 632,5 тыс. квадратных метраў, прычым у асноўным для шматдзетных сем'яў, якія атрымалі 451,9 тыс. квадратных метраў агульнай плошчы жылля.

Аб'ём увядзення ў строй жылля з дзяржпадтрымкай за гэты перыяд павялічыўся на 22,8%.

Паводле тэмпаў росту ў гэтым сегменце таксама ў лідарах Менск, у якім з дзяржпадтрымкай было пабудавана жылля ў 2,34 разы больш, чым за першае паўгоддзе 2020 года, гэта значыць 72,6 тыс. квадратных метраў жылля.

У той самы час, паводле вынікаў студзеня – траўня ў сталіцы было ўзведзена падобнага жылля ўсяго 28,4 тыс. квадратных метраў. Гэта значыць, у чэрвені аб'ёмы падобнага будаўніцтва рэзка паскорыліся, што стала другой прычынай павелічэння тэмпаў будаўніцтва ў сталіцы.

Нягледзячы на гэта, Менск знаходзіцца ўсяго на пятым месцы ў будаўніцтве з дзяржпадтрымкай. На першым – Берасцейская вобласць, у якой з дзяржпадтрымкай пабудавана 149,3 тыс. квадратных метраў, на 6,1% больш, чым за першую палову 2020 года.

Аднак такі поспех мае і адваротны бок – парушэнні пры будаўніцтве, прычым якраз пры будаўніцтве з дзяржпадтрымкай. Паводле звестак КДК Берасцейскай вобласці, пры будаўніцтве жылля для шматдзетных сем'яў у Пінскім раёне, тры прыватныя падрадныя арганізацыі набывалі будаўнічыя матэрыялы ў шматлікіх пасрэднікаў, а таксама ў раздробным гандлі з надбаўкамі, большымі за рынкавыя кошты ад 20% да 150%.

На другім месцы будаўніцтва жылля з дзяржпадтрымкай знаходзіцца Менская вобласць. У ёй за паўгоддзе было пабудавана падобнага жылля на 54,3% больш, гэта значыць 123,2 тыс. квадратных метраў. Усяго ў вобласці ўзвялі 539,2 тыс. квадратных метраў – на 9% больш, чым год таму.

Адзіны рэгіён Беларусі, у якім будаўніцтва жылля ў гэтым годзе скарачаецца, гэта Магілёўскай вобласці ў ёй пабудавана жылля на 20,3% менш, чым у аналагічным перыядзе летась, гэта значыць 131,2 тыс. квадратных метраў агульнай плошчы. Але ў Віцебскай вобласці ўведзена ў эксплуатацыю жылля яшчэ менш: 118,8 тыс. квадратных метраў.

Хоць гэта ўсё ж на 7,8% больш чым год таму. У абедзвюх абласцях значна скарацілася будаўніцтва жылля з дзяржпадтрымкай.

Жыллё ў Беларусі будуецца, у асноўным, у гарадах, а ў сельскіх населеных пунктах у студзені – чэрвені 2021 года ўведзена ў эксплуатацыю ўсяго 569,4 тыс. квадратных метраў агульнай плошчы жылля, што складае 27,9% ад агульнага аб'ёму будаўніцтва жылля ў краіне.