Кіраўнік МУС Літвы прапануе ўвесці надзвычайнае становішча на мяжы з Беларуссю

У такім выпадку кантроль над мяжой возьме войска, і траплянне на тэрыторыю Літвы будзе немагчымым.

Міністр унутраных спраў Літвы Агне Білалайтэ заявіла, што МУС прапанавала ўраду ўвесці надзвычайнае становішча ў памежных самакіраваннях, піша delfi.lt.

«МУС агучвае прапанову ацаніць па сітуацыі і магчыма абвясціць надзвычайнае становішча», - заявіла міністр на прэс-канферэнцыі ў аўторак.

Старшыня Камітэта Сейма Літвы ў нацыянальнай бяспецы і абароне Лаўрынас Кашчунас заявіў, што ўвядзенне надзвычайнага становішча можа быць разгледжанае для ўзяцця пад кантроль сітуацыі з міграцыйным крызісам.

Са слоў Кашчунаса, у такім выпадку кантроль над мяжой пераняло б войска, і траплянне на тэрыторыю Літвы было б немагчымым.

«Павінны быць разгледжаныя ўсе варыянты, мы павінны быць гатовымі да ўсіх сітуацый, і гэта адна з опцый, якая можа ператварыцца ў рэальнасць», - заявіў Л. Кашчунас BNS аб магчымасці ўвядзення надзвычайнага становішча на мяжы з Беларуссю.

З ягоных слоў, істотнае адрозненне палягала б у тым, «што па сутнасці цалкам кантралявалася б перасячэнне мяжы, усе парушэнні перарываліся бы, і было б забаронена трапляць на літоўскую тэрыторыю».

«Фактычна гэта азначае, што ў пэўным памежным рэгіёне, пры захаванні ўсіх правоў і свабод, без закранання нашага дэмакратычнага працэсу, толькі на памежнай прасторы, кантроль пераймае войска, і мяжа, фактычна закрываецца, і парушэнні немагчымыя», - сказаў Л. Кашчунас.

Са слоў кіраўніка КНБА, пры такім рэжыме Літва не абавязаная ўпускаць мігрантаў, а дыслакацыя войска, на сцвярджэнні Л. Кашчунаса, будзе стрымліваць ад жадання перайсці мяжу.

Ён таксама адзначыў, што для ўвядзення надзвычайнага становішча варта заручыцца згодай кіраўніцтва краіны - як прэзідэнта, так і Сейма.

«Гэта можа быць дэкрэт прэзідэнта, на мой погляд, павінна быць слова і з боку прэзідэнта», - сказаў Л. Кашчунас.

Паводле закона надзвычайнае становішча ўводзіць Сейм, а паміж парламенцкімі сесіямі гэта можа зрабіць прэзідэнт, аднак тады ён склікае пазачарговую сесію парламента, і Сейм зацвярджае або касуе пастанову кіраўніка дзяржавы.

У аўторак аб увядзенні надзвычайнага становішча ў сувязі з міграцыйным крызісам загаварыў і лідар парламенцкай апазіцыі Саўлюс Сквярняліс, аднак ён адзначыў, што для гэтага патрабуецца шырокая палітычная згода, а таксама праца з грамадскасцю.

Аб увядзеннi надзвычайнага становiшча палітык заявіў пасля здушанага ў панядзелак пратэсту ў Руднікай, дзе некалькі дзясяткаў чалавек супраціўляліся планам урада пасяліць на палігоне нелегальных мігрантаў. Пратэстоўцы блакавалі дарогу, якая вядзе на тэрыторыю. Службовым асобам давялося сілай разганяць дэманстрантаў.

Паводле закона надзвычайнае становішча можа быць уведзенае на ўсёй тэрыторыі Літвы або на яе частцы - у асобных тэрытарыяльна-адміністрацыйных адзінках, памежных адрэзках ці ў іншых частках тэрыторыі дзяржавы.

Надзвычайнае становішча - гэта асаблівы прававы рэжым, які дазваляе ўжываць часовыя абмежаванні на рэалізацыю правоў і свабод фізічных асоб, можа ўводзіцца каменданцкая гадзіна.

Надзвычайнае становішча можа ўводзіцца, калі з прычыны экстрэмальнай сітуацыі або крызісу, якія склаліся ў краіне, узнікае пагроза канстытуцыйнай форме ці грамадскаму спакою, а гэтую пагрозу немагчыма ліквідаваць без выкарыстання надзвычайных захадаў, прадугледжаных у Канстытуцыі і законам.