Расейцаў ахапіла крэдытная вакханалія

Пазыкі фізічных асоб перад банкамі дасягнулі амаль 23 трыльёны рублёў.

Расейскія грамадзяне прадаўжаюць набіраць крэдыты з рэкорднай у гісторыі хуткасцю, нягледзячы на падзенне рэальных наяўных даходаў і спроб ЦБ астудзіць рынак падвышэннем ключавой стаўкі і ўзмацненнем жорсткасці нарматываў, піша finanz.ru.

За чэрвень пазыкі фізічных асоб перад банкаўскай сістэмай выраслі яшчэ на 558 млрд рублёў і дасягнулі 22,756 трыльёна рублёў, вынікае са статыстыкі ЦБ.

З пачатку года банкі нарасцілі крэдытаванне фізічных асоб на 2,012 трыльёна рублёў, а за апошнія 12 месяцаў - на 4,368 трыльёна - суму, роўную 8% грашовых даходаў насельніцтва.

Хуткасць, з якой спажыўцы закопваюцца ў пазыковую яму, павялічваецца як у абсалютным, так і ў адносным выражэнні: у сакавіку гэта былі 283 млрд рублёў, красавіку - 468 млрд рублёў, у траўні - 469 млрд.

У чэрвені «крэдытная вакханалія на раздробным рынку яшчэ больш узмацнілася», канстатуе эканаміст банка «Цэнтракрэдыт» Яўген Сувораў: гадавыя тэмпы росту партфеля банкаў дасягнулі 21,7% супраць 19,9% у траўні і 15-16% зімой, а за паўгоддзе аб'ёмы выдачы ў 3,2 разу перавысілі паказчыкі студзеня-чэрвеня 2020 года.

У выніку сумарная пазыка насельніцтва перад банкаўскай сістэмай перавысіла суму федэральнага бюджэту і ўпершыню ў гісторыі практычна зраўнялася з сумай, якую грамадзяне трымаюць у банках на рублёвых рахунках і ашчадках (25,667 трлн рублёў).

Кліенты, якія бяднеюць сем гадоў запар, - фізічныя асобы пачалі працаваць як «пыласос», выцягваюць ліквіднасць з банкаў: з пачатку года яны не толькі ўзялі 2 трыльёны рублёў пазык, але і знялі з дэпазітных і існых рахункаў 366 рублёў.

У выніку суадносіны крэдытаў і рублёвых ашчадкаў - 88,8% - дасягнулі максімуму за ўсю гісторыю статыстыкі ЦБ.

Вельмі моцны попыт на раздробныя крэдыты - гэта фактар, які можа мець інфляцыйныя наступствы, адзначае галоўная эканамістка «Альфа-банка» Наталля Арлова.

«Наўпроставым следствам крэдытнага росту з'яўляецца прадаўжэнне хуткага павелічэння коштаў нерухомасці (+10% з пачатку года). Такая дынаміка працуе ў падтрымку агульных завышаных інфляцыйных чаканняў», - адзначае яна.

«Калі суадносіць, напрыклад, запазычанасць па крэдытах з даходамі насельніцтва, то такі паказчык цяпер знаходзіцца на максімумах - 36%, пры тым, што яшчэ да крызісу ў 2019 годзе ён складаў 30%», - паказвае аналітык «Райффайзэнбанка» Станіслаў Мурашоў.

З 1 ліпеня ЦБ вярнуў дакавідныя надбаўкі да каэфіцыентаў рызыкі для незабяспечанага спажыўкрэдытавання: гэта азначае, што банкам спатрэбіцца больш капіталу, каб выдаваць пазыкі, а стаўкі па іх, адпаведна, падвысяцца.

На рынку «ўжо заўважныя прыкметы пачатку перагрэву», заявіла на прэс-канферэнцыі ў пятніцу кіраўніца цэнтрабанка Эльвіра Набіуліна.

«Многія пазычальнікі імкнуцца паспець узяць крэдыт больш нізкімі стаўкамі», - канстатавала яна, дадаўшы, што з улікам звестак за апошнія месяцы рэгулятар падрыхтуе дадатковыя захады для абмежавання крэдытнага буму.