Жыхар Баранавічаў атрымаў касмічны кошт за ваду

Чым усё скончылася?

Камунальныя службы налічылі жыхарам кватэры ў новабудоўлі на вуліцы Міцкевіча амаль 98 рублёў за падагрэў 1,5 кубаметраў вады і настойваюць на тым, што разлік быў дакладным. Але новая жыроўка прыйшла ўдвая меншай за папярэднюю. Intex-press разбіралася ў гэтым пытанні.

Пра праблему сям'і Алляновых, якім за травень налічылі нерэальную суму за падагрэў вады – 97,79 рубля за паўтара кубаметры, рэдакцыя пісала ў пачатку ліпеня.

Тады атрымаць аператыўны каментар у ЖРЭУ не атрымалася: там патлумачылі, што сітуацыя, якая склалася ў сям'і Алляновых з аплатай камунальных паслуг, «індывідуальная і трэба ў ёй разбірацца».

Мы адправілі запыт, у якім папрасілі патлумачыць, адкуль узялася такая сума, ці не памыліліся камунальныя службы з разлікамі, а калі памыліліся, то як будуць выходзіць з сітуацыі, якая склалася.

Чым больш жыхароў, тым менш плаціць?

У адказе, які мы атрымалі на днях, было сказана, што «ў шматкватэрным жылым доме з цэнтральнай сістэмай гарачага водазабеспячэння пры адкрыцці засавак падачы гарачай вады вырабляецца цыркуляцыя вады па сістэме, такім чынам, адбываецца страта цеплавой энэргіі нават пры адсутнасці водазабору. Як толькі спажыўцы адчыняюць кран з гарачай вадой, адбываецца водазабор і затраты на падтрыманне гарачай вады ў сістэме размяркоўваюцца спажыўцамі прапарцыйна ў спажыванні аб'ёму гарачай вады».

Прасцей кажучы, як толькі дом падключылі да сістэмы гарачага водазабеспячэння, тэмпературу вады ў ёй неабходна падтрымліваць увесь час, нават калі жыхары ёю карыстаюцца мала ці не карыстаюцца зусім. А выдаткі на тое, каб па сістэме цыркулявала вада патрэбнай тэмпературы, павінны кампенсаваць жыхары. Такім чынам, чым менш чалавек жыве ў доме, тым большую суму выдаткаў кожнаму асобнаму жыхару даводзіцца кампенсаваць. А лічыльнікі, атрымліваецца, патрэбныя толькі для таго, каб выдаткі дзяліліся не пароўну, а ў залежнасці ад таго, хто колькі гарачай вады спажыў.

«Жыхарам тлумачылася, што ўключэнне паслугі гарачага водазабеспячэння пры нізкай колькасці ўласнікаў памяшканняў у доме эканамічна немэтазгоднае і вынікуе большы кошт пры налічэнні за паслугу, аднак на іх просьбы гарачае водазабеспячэнне было ўключанае 29 сакавіка. Да гэтага яны жылі без гарачай вады, – растлумачылі ў КУРЭП "ЖРЭУ г. Баранавічы". – Звычайна, пры долевым будаўніцтве практычна ўсе ўласнікі ўсяляюцца адразу, таму такой праблемы і не ўзнікае. Калі б хоць бы 50% уласнікаў засялілася, то аплата за гэтую паслугу была б значна меншая».

Ёсць пытанні

Здавалася б, сістэма разліку цалкам зразумелая. Але ў нас яна выклікала некалькі пытанняў.

Па-першае, у якім канкрэтна дакуменце прапісана, што чалавек павінен плаціць не за тую ваду, якую выліла ягоная сям'я, а, груба кажучы, за ўсю гарачую ваду ў доме? У адказе ЖРЭУ мы не знайшлі ніводнай дасылкі да дзейнага заканадаўства.

Па-другое, вынікаючы з логікі камунальных службаў, за красавік сям'я Алляновых павінна была атрымаць такую ж «цяжкую» жыроўку, як і за травень, бо колькасць жыхароў у доме на Міцкевіча калі і змянілася, то відавочна не ў бок змяншэння. Але ў красавіку сям'і выставілі рахунак на 32,28 рубля. Больш за тое, за чэрвень, паводле словаў Сяргея Аллянова, таксама прыйшла «нармальная» жыроўка.

– Паводле новай жыроўкі заплаціць за камунальныя паслугі давядзецца блізу 42 рублёў. Але чаму так зрабілі, ніхто не патлумачыў. Мабыць, самі моўчкі ўсё пералічылі, – адзначыў Сяргей Алляноў.

Увогуле, паколькі новабудоўляў у горадзе здаецца нямала і многія гараджане могуць сутыкнуцца з тымі ж пытаннямі, мы надумалі ўсё ж такі растлумачыць сітуацыю.

Хаджэнне па коле

Паколькі ў Баранавічах мы так і не здолелі знайсці спецыяліста, які дакладна расказаў бы, што за заканадаўчыя акты рэгулююць пытанні аплаты падагрэву гарачай вады ў дамах (а мы звярталіся нават да незалежнага юрыста, які спецыялізуецца на тэме ЖКГ), мы пастанавілі пайсці вышэй і для пачатку патэлефанавалі ў Берасцейскую абласную ўправу ЖКГ.

Аднак там нам адказалі, што «разбірацца ў гэтым пытанні трэба з мясцовымі арганізацыямі».

Потым мы паспрабавалі датэлефанавацца ў Міністэрства ЖКГ, але цягам чатырох дзён мы набіралі ўсе нумары тэлефонаў, названыя на сайце, а трубку ні на адным з іх ніхто так і не ўзяў.

Не дапамагла нам і служба 115. Не, на спецыяліста, які тэарэтычна павінен быў нам даць кансультацыю, пераключылі, аднак ад яго мы толькі пачулі, што адказваць на такія пытанні не ўваходзіць у ягоную кампетэнцыю, паколькі ён толькі размяркоўвае заяўкі.

У выніку мы пастанавілі звярнуцца ў кампанію, якая спецыялізуецца на паслугах, звязаных у тым ліку з вытлумачэннем беларускага заканадаўства.

Там з адсылкай на канкрэтныя заканадаўчыя акты нам пацвердзілі, што сума аплаты за падагрэў вады налічваецца паводле прыбора групавога ўліку выдаткаў цеплавой энэргіі на падагрэў вады, які павінен стаяць у доме: паказанні агульнага лічыльніка дзеляцца на кожнага падаткаплацельніка прапарцыйна таму, колькі гарачай вады яны спажылі. І толькі калі агульнага лічыльніка ў доме няма, аплата ідзе зыходзячы з аб'ёмаў спажывання гарачай вады кожным плацельнікам.

– З усяго відаць, у доме ёсць агульны лічыльнік выдаткаў цеплавой энэргіі і з ягоных паказанняў спажыванне цеплавой энэргіі размяркоўваецца паміж жыхарамі, прапарцыйна спажыванню гарачай вады паводле паказанняў індывідуальных прыбораў уліку, – паведаміў Алег Бандык, юрыст кампаніі «Экспертцэнтр».

Ён таксама растлумачыў, што ў гэтым выпадку спажыўцы маюць права запытаць у ЕРСЦ падрабязны разлік платы за гарачае водазабеспячэнне з паказаннямі прыбора групавога ўліку выдаткаў цеплавой энэргіі на падагрэў вады альбо ўказаннем, адкуль і якім чынам быў вызначаны выдатак цеплавой энэргіі на падагрэў вады. Пры наяўнасці спрэчкі спажыўцы маюць права падаць скаргу ў мясцовы выканкам, а таксама ў суд.

Таксама юрыст падкрэсліў, што, калі спажыўцы падазраюць, што ў доме можа быць, да прыкладу, выцечка гарачай вады, яны маюць права звярнуцца ў кіравальную домам арганізацыю з патрабаваннем правесці агляд і ліквідаваць магчымыя непаладкі.