27 верасня 2021, панядзелак, 7:29
Сім сім, Хартыя 97!
Рубрыкі

У Беларусі недахоп дзяржкіраванцаў

12
У Беларусі недахоп дзяржкіраванцаў
ФОТА: ЕЎРАРАДЫЁ

Віной таму сацнагрузка і планавыя паказнікі.

На сайце Менскага аблвыканкама размешчаная аб'ява, у якой паведамляецца пра 42 вакантныя месцы кіраўнікоў дзяржарганізацый у розных сферах. Больш за ўсё ў Менскай вобласці не хапае дырэктараў-«гаспадарнікаў» у аграсектары, паведамляе «Еўрарадыё».

Заробкі прапануюць розныя. Ёсць цалкам «дырэктарскія» заробкі: напрыклад, у «Віцебскаблгаз» намесніку дырэктара бяспекі прапаноўваюць 3.512,14 рубля, а на такой самай пасадзе ў «АГАТ-сістэме кіравання» – 3.326,06 BYN.

А ў аддзеле фізічнай культуры, спорту і турызму Рэчыцкага райвыканкама дырэктару спецыялізаванай спартовай школы абяцаюць 550 рублёў за месяц. Галоўнае патрабаванне – наяўнасць фізкультурнай адукацыі.

– Чаму такі маленькі заробак? Таму што бюджэтная арганізацыя, – адказваюць у Рэчыцкім аддзеле спорту і турызму. – Можна будзе атрымаць трохі больш. Працоўны графік з 8.30 да 17.30. Бывае так, што трэба ў выходныя выйсці. Нам яшчэ і намеснік у асноўнай дзейнасці патрэбны.

Заробак залежыць яшчэ і ад прэміі, таму што бываюць такія сітуацыі, што няма эканоміі [сродкаў. – рэд.]. Мы вось пакажам у аб'яве заробак на тысячу рублёў, чалавек прыйдзе, а мы скажам: дзе ж мы вам яго возьмем?

Паводле словаў чыноўніцы, дырэктара ў спартовую школу шукаюць ужо даўно.

Чаму склалася такая сітуацыя?

Маленькія заробкі дырэктарам прапануюць далёка не ўсюды, але ўсё роўна стала ёсць вакантныя месцы. Можа, рэч не ў заробках?

– Тэндэнцыя запатрабаванасці дырэктараў дзяржпрадпрыемстваў не новая, яна была заўсёды, – расказвае аналітык з беларускага HR-сэрвісу. – Па-першае, дзяржпрадпрыемства працуе ў зусім іншых умовах. Прыватная арганізацыя працуе, плаціць падаткі, не парушае заканадаўства, і, у прынцыпе, гэтага дастаткова. Дзяржпрадпрыемства нясе павышаную сацыяльную нагрузку і мае кучу паказнікаў, якія яно павінна выконваць. Да таго ж на дзяржпрадпрыемстве заробак не заўсёды даганяе ўзровень заробкаў прыватных арганізацый, таму складана бывае знайсці кандыдатаў.

У пошуку кампетэнтных кіраўнікоў у прыватныя кампаніі рэкрутынгу чыноўнікі з прадпрыемстваў звяртаюцца нячаста.

– Для таго каб аплаціць нашу паслугу, прадпрыемству трэба мець для гэтага бюджэт і фонды, за якія трэба даць справаздачу. Да таго ж закупка паслуг і тавараў у гэтым выпадку вырабляецца на тэндарнай аснове.

Ці ёсць розніца ва ўзроўні кампетэнтнасці топ-мэнэджара дзяржпрадпрыемства і дырэктара прыватнай кампаніі?

– Яны не горшыя і не лепшыя адзін за аднаго, проста яны вельмі розныя, таму што вельмі розныя эканомікі, – прадаўжае аналітык. – Калі цяпер усю эканоміку зрабіць прыватнай, то рэзка не будзе хапаць кіраўнікоў прыватных кампаній. Адкуль возьмецца столькі людзей адпаведнай кампетэнцыі? Як гаворыцца, зямля павінна іх нарадзіць, эканоміка павінна іх выхаваць. На гэта спатрэбіцца некалькі гадоў, але яны з'явяцца.

Размаўляючы з кіраўніком дзяржпрадпрыемства – напрыклад, у аграрным сектары, – разумееш, што перад чалавекам стаяць вельмі няпростыя задачы. Я нават сказаў бы, што мазгі ў гэтых людзей нядрэнна цямяць. Але яны могуць не карыстацца нейкім спецыялізаваным софтам, скажам, 1С: ERP [комплексная інфармацыйная сістэма для кіравання дзейнасцю прадпрыемства. – рэд.]. Таму што яму трэба адказваць за паказнікі, там зусім іншая рэальнасць, і дырэктар спрабуе ёй адпавядаць.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».