Рада БАР: Страйк - адзінае выйсце
15- 7.07.2021, 22:17
- 27,660
Але патрэбна канкрэтная падрыхтоўчая праца.
Усе мы хочам жыць у нармальнай краіне, атрымліваць годны заробак за сваю працу, адчуваць сябе ў бяспецы і быць упэўненымі ў будучыні нашых дзяцей. Сённяшняя рэальнасць у Беларусі цалкам іншая: рабочыя часта працуюць у паўразбураных цэхах на няспраўным абсталяванні, рызыкуючы не вярнуцца дадому. Мы атрымліваем капейкі, а паразіты рознай масці балююць за наш кошт. Працоўнага чалавека не паважаюць: нам навязалі кабальную кантрактную сістэму, масавыя звальненні носяць адвольны характар, нам затыкаюць раты, нязгодных садзяць у турмы, хаваюць праўду пра траўматызм і смяротнасць на вытворчасці.
Пара падымацца з каленяў. Бо ў краінах, дзе заробкі і ўзровень жыцця ў разы вышэйшы, чым у Беларусі, рабочыя дамагліся гэтага самі, баронячы свае законныя правы ўсімі магчымымі спосабамі.
Давайце верыць у сябе. Красавік 1991 года, жнівень 2020 года. Рабочы клас Беларусі ўжо паказваў сваю сілу. Цяпер мы павінны перамагчы!
Страйк - адзіны выхад з сітуацыі, але патрэбна канкрэтная падрыхтоўчая праца:
- Агітацыя.
- Падрыхтоўка ўдзельнікаў.
- Размеркаванне абавязкаў.
- Праверка гатоўнасці.
Што мы робім?
1. Набіраем масу - усталёўваем гарызантальныя сувязі: размаўляем з калегамі/сябрамі/паплечнікамі, правяраем колькасць.
2. Вядзём тлумачальную працу (як вусна, так і з дапамогай газет, улётак і інтэрнэту).
3. Асабістая і сямейная падрыхтоўка - дзе і як мы і нашы блізкія правядуць час страйку.
4. Матэрыяльная арганізацыя - здымаем грошы ў банку, запасімся прадуктамі і іншымі неабходнымі рэчамі для перыяду страйку.
5. Практычная падрыхтоўка - прадумваем і рэалізуем крокі бяспечнага прыпынення вытворчасці.
Мы - рабочыя. Мы - народ Беларусі. Мы - сіла!
Тэлеграм-канал «Беларускага аб'яднання працоўных» (БАР)