Аптовыя кошты бензіну ў Расеі абнавілі гістарычны рэкорд 13-м разам за месяц
- 3.08.2021, 15:14
- 2,296
Буянства коштаў прадаўжаецца.
На расейскім рынку бензіну прадаўжаецца буянства коштаў, нягледзячы на рэкордныя ўліванні ў нафтавікоў з бюджэту і пагрозы ўрада ўвесці замарожванне і забараніць экспарт, піша finanz.ru.
У аўторак на таргах Санкт-Пецярбуржскай міжнароднай таварна-сыравіннай біржы (СПбМТСБ) кошт «Рэгуляр-92» 13-м разам з пачатку ліпеня абнавіў гістарычны рэкорд.
Каціроўкі падымаліся да адзнакі 57,602 тысячы расейскіх рублёў за тону і, дадаўшы 0,5% за дзень, і на 120 расейскіх рублёў перавысілі папярэдні максімум, устаноўлены 22 ліпеня.
Да новага рэкорду ўзляцеў кошт звадкаваных вуглевадародных газаў (ЗВГ): рост на 1,3% за дзень падкінуў каціроўкі да адзнакі 43,399 тысячы расейскіх рублёў за тону.
Дызельнае паліва падаражэла на 0,2%, да 51,48 тысячы расейскіх рублёў за тону, тады як бензін «Прэміум-95» абрынуўся ў кошце на 0,2%, да 58,75 тысячы расейскіх рублёў.
З пачатку года 92-ы бензін падаражэў на біржы на 21%, 95-ы - на 20%.
30 ліпеня міністр энэргетыкі РФ Мікалай Шульгін паведаміў, што Мінэнэрга звярнулася ва ўрад з прапановай запусціць працэс уводу абмежаванняў на экспарт бензіну з Расеі.
Раней ён казаў, што міністэрства ініцыюе ўвядзенне забароны, ацаніўшы сітуацыю з біржавымі коштамі паліва. З ягоных слоў, тэрмін забароны на экспарт можа скласці мінімум тры месяцы.
Папярэдняя спроба ўтаймаваць паліўную інфляцыю жорсткімі захадамі ў дачыненні да нафтавікоў скончылася перамогай нафтавага лобі: пасля нарад з прадстаўнікамі галіны вясной улады адмовіліся ад ідэі забароны на экспарт і замест гэтага змянілі параметры дэмпфера - механізму, які стабілізуе рынак, уведзенага ў адказ на бензінавы крызіс 2018 года.
Паводле новай формулы нафтавыя кампаніі змогуць атрымаць дадаткова 350 млрд расейскіх рублёў з федэральнага бюджэту для прыпынення росту коштаў.