У памежнай службе Літвы распавялі пра тое, як вяртаюць мігрантаў у Беларусь

Ужо вярнулі як мінімум 180 чалавек.

Літоўскія памежнікі з аўторка пачалі вяртаць у Беларусь нелегальных мігрантаў, якіх затрымалі на мяжы з нашай краінай. Ужо вярнулі як мінімум 180 чалавек. У гэтай сітуацыі ўзнікае нямала пытанняў. Да прыкладу, ці ўсіх затрыманых мігрантаў будуць адпраўляць у Беларусь? А калі мігрант запытае палітычны прытулак, то яго ўсё адно папросяць назад? Zerkalo.io пацікавілася ў Дзяржаўнай службы аховы дзяржаўнай мяжы пры МУС Літвы, як на практыцы працуе механізм па вяртанні мігрантаў.

- Мы атрымалі інструмент, які нам дазваляе не ўпусціць чалавека ў Літву, - тлумачыць прадстаўнік Дзяржаўнай службы аховы мяжы МУС Літвы Рокас Пукінскас. - Калі супрацоўнікі Дзяржаўнай службы аховы дзяржаўнай мяжы сустрэнуць нелегальнага мігранта на мяжы з Беларуссю, то яму проста не дазволяць яе нелегальна перайсці. Ім і скажуць: «Калі ласка, вярніцеся ў Беларусь і трапляйце ў Літву легальна, праз кантрольна-прапускны пункт». Пры гэтым іх ніхто не пазбаўляе права падаць просьбу аб часовым тэрытарыяльным прытулку. Але гэта павінна быць зроблена тады, калі яны трапяць у Літву легальна, праз кантрольна-прапускныя пункты. Запытаць прытулак таксама можна праз літоўскую амбасаду. Такі механізм існуе.

На ўдакладняючае пытанне, ці ўсіх усё ж мігрантаў, якія перасякуць мяжу і апынуцца на тэрыторыі Літвы, будуць адпраўляць назад у Беларусь, у памежнай службе Літвы не змаглі адназначна адказаць. «Гэтая пастанова (МУС Літвы аб вяртанні мігрантаў. - Заўвага. Рэд.) дзейнічае паўдня, пакуль не можам сказаць», - сказаў прадстаўнік памежнай службы.

З ягоных слоў, пакуль сітуацыя выглядае так: тых нелегальных мігрантаў, якіх літоўскія памежнікі знойдуць недалёка ад мяжы з Беларуссю, маюць намер вяртаць назад. Калі ж мігрантаў затрымаюць далей ад мяжы, да прыкладу ля нейкага населенага пункта, то іх адправяць на спецыяльную заставу, а потым размяркуюць па лагерах для ўцекачоў, як гэта адбывалася і да цяперашняй пастановы літоўскага МУС.

«Нашы супрацоўнікі навучаныя тактычным здольнасцям, яны гэта будуць ужываць. Але няма мяжы, на якой затрымліваюць 100% парушальнікаў. Літоўская мяжа - гэта не выключэнне», - удакладняюць у памежнай службе.

Мігрантам, якіх накіроўваюць у лагеры, сярод іншага робяць тэст на каранавірус. Тым нелегалам, якіх будуць разварочваць на мяжы або недалёка ад яе і вяртаць у Беларусь, такія тэсты не маюць намер рабіць.

- Чалавек на тэрыторыі Беларусі, прыходзіць у Літву. І калі яму паказваецца вярнуцца ў Беларусь, то чаму ж мы павінны яму рабіць тэст на каранавірус? Калі чалавек трапляе ў Літву, то яму робяць тэст на каранавірус, - тлумачыць прадстаўнік літоўскай памежнай службы.

У гэтай сітуацыі ўзнікае пытанне, як будуць вызначаць, груба кажучы, адлегласць ад мяжы, пры затрыманні на якой будуць адпраўляць назад мігрантаў у Беларусь, а на якой - у лагеры для бежанцаў.

«Кожны выпадак разглядаецца індывідуальна», - паведамляюць у памежнай службе Літвы.