Беларускі крызіс стаў міжнароднай праблемай
9- ВАЛЕР КАРБАЛЕВІЧ
- 4.08.2021, 12:38
- 15,448
У цэнтры Еўропы з'явіўся асяродак дэстабілізацыі.
Некалькі розных фактаў толькі за апошнія два з паловай месяцы.
Пасадка самалёта кампаніі Ryanair ў Менску і затрыманне Рамана Пратасевіча.
Лукашэнка пагражаў перакрыць транзіт праз Беларусь тавараў тых краін, якія праводзяць палітыку непрыязнага стаўлення афіцыйнага Менску.
Штучны міграцыйны крызіс на беларуска-літоўскай мяжы, які абвастраецца. Лукашэнка паабяцаў, што хутка на тэрыторыі Літвы з'явяцца мігранты са зброяй. Літоўскія ўлады прынялі пастанову вяртаць нелегальных мігрантаў у Беларусь.
Лукашэнка заявіў аб магчымасці размяшчэння расейскіх войскаў на тэрыторыі Беларусі.
Скандал са спартоўкай Крысцінай Ціманоўскай, якую за крытыку кіраўніцтва каманды Беларусі ў лёгкай атлетыцы паспрабавалі выслаць з Алімпіяды ў Токіё ў Менск без яе згоды.
Кіраўніка «Беларускага дома ва Украіне» Віталя Шышова знайшлі павешаным у Кіеве.
Беларуска-расейскія вайсковыя вучэнні ў верасні ўжо сёння выклікаюць напружанасць у рэгіёне.
Што аб'ядноўвае ўсе гэтыя факты? Што ў іх агульнага?
На мой погляд, яны сведчаць аб тым, што беларускі палітычны крызіс ператвараецца ў крызіс рэгіянальны. Неўрэгуляванасць унутрыбеларускай праблемы і нават яе абвастрэнне выліваецца за межы Беларусі, спараджае праблему рэгіянальнай і наогул міжнароднай бяспекі. Гэта даўно ўжо не толькі гуманітарнае пытанне адной краіны. Беларусь, якая з 2014 да 2020 год прадставіла сябе донарам рэгіянальнай і еўрапейскай бяспекі, на вачах ператвараецца ў фактар росту міжнароднай напружанасці.
Гуманітарны крызіс у Беларусі выштурхнуў за мяжу дзясяткі тысяч беларусаў, якія пераязджаюць у суседнія краіны і ствараюць там пэўныя праблемы.
Варта адзначыць, што беларускі кейс абвастрае канфлікт паміж Расеяй і Захадам.
Афіцыйны Менск бяжыць тут наперадзе паравоза і фактычна ўцягвае Маскву ў нейкія новыя канфлікты з ЕЗ і ЗША. Беларусь становіцца чыннікам канфліктагеннасці расейска-заходніх стасункаў. Справа даходзіць да таго, што прэс-сакратар прэзідэнта Расеі Дзмітрый Пяскоў вымушаны дэзавуяваць заявы Лукашэнкі.
Мяркую, міжнародная супольнасць недаацаніла пагрозу перарастання беларускага палітычнага крызісу ў міжнародную праблему. ЕЗ рэагаваў са спазненнем, нерашуча, спадзеючыся на вяртанне звыклага статус-кво.
А ў выніку ў цэнтры Еўропы з'явіўся асяродак дэстабілізацыі, які чым далей, тым больш пагражае міжнароднай бяспекі. І з гэтым трэба нешта рабіць. Ці здольная міжнародная супольнасць на развязанне праблемы? Адказ пакуль невідавочны.
Валерый Карбалевіч, Telegram