Меркаванне: Пачаты працэс, які можа мець для беларускіх банкаў такія ж наступствы, як адключэнне ад сістэмы SWIFT

Raiffeisen Bank запусціў эфект даміно?

Учора аўстрыйскае выданне Die Presse паведаміла, што Raiffeisen Bank спыняе правядзенне міжнародных пераводаў для Беларусбанка.

«Вось, можа, памятаеш, даўно ўжо была справа, мы з табой абмяркоўвалі перспектывы адключэння беларускіх банкаў ад міжнароднай сістэмы SWIFT. І, вядома, прыйшлі да высновы, што гэта вельмі малаімаверна», - піша з нагоды гэтай навіны тэлеграм-канал «Лісты да дачкі»:

- Але практыка жыцця больш разнастайная за ўсялякія тэорыі. Так пастанова Raiffeisen Bank - пачатак працэсу, які дэ-факта можа мець для беларускай фінансавай сістэмы прыкладна такія ж наступствы, як адключэнне ад сістэмы SWIFT. Таму што, калі банк перастае атрымліваць міжнародныя пераводы, гэта значыць, што яго кліенты не могуць ні расплаціцца, ні атрымаць грошай у сваіх вонкавых кантрактах. А каму патрэбны партнёр, які не плаціць?

Вядома, Беларусбанк - не адзіны банк у краіне. Ды і на Raiffeisen Bank свет клінам не сышоўся. Можна знайсці сабе іншыя банкі. Але, Raiffeisen Bank - адзіны заходні банк, у якога ёсць беларуская дачка. Так што яго пастанова - красамоўны прыклад для астатніх. Таму што ў адрозненне ад астатніх яму ёсць тут што губляць. Але, атрымліваецца, што банк палічыў, палічыў і вызначыў, што лепш страціць усё, што ім тут нажытае непасільнай працай, чым рызыкаваць непрадказальнымі наступствамі супрацоўніцтва з дзяржаўным беларускім банкам. Таму што ў першым выпадку маштабы патэнцыйных страт хоць бы загадзя вядомыя.

І, вядома, нават калі ўсе заходнія банкі зробяць па прыкладу Raiffeisen, застануцца яшчэ банкі Расеі. А расейскія банкі нікуды не падзенуцца. Ну хутчэй за ўсё, нікуды не падзенуцца. Гэта значыць, фінансавае суправаджэнне экспартных кантрактаў, тэарэтычна, можна будзе ажыццяўляць праз які-небудзь Знешэканомбанк. Але практычна... Ці шмат знойдзецца ў Еўропе кампаній, якія захочуць атрымліваць грошы праз Магадан? (Я маю на ўвазе - выкарыстоўваючы складаныя і непразрыстыя схемы аплаты). Не адказвай. Гэта было рытарычнае пытанне. Улічваючы сумнеўную прэміяльнасць беларускага рынку і асаблівасці рэпутацыі беларускіх уладаў, сумняваюся, што знойдзецца шмат ахвотных.

Вось санкцыі, якія ЕЗ увёў супраць Беларусбанка, напраўду не прадугледжвалі такіх радыкальных захадаў уздзеяння, як забарона на міжнародныя пераводы. Там гаворка ішла ўсяго толькі пра абмежаванні на выдачу крэдытаў. І, атрымліваецца, што, уведзенае Raiffeisen Bank самаабмежаванне было выключна яго прыватнай ініцыятывай. Вось тым самым ускосным наступствам санкцый, шкоды ад якога значна больш, чым ад саміх санкцый.

І па меры таго, як унутраны беларускі крызіс перарастае ў рэгіянальную праблему, ахвотных мець справу з беларускімі ўладамі будзе станавіцца ўсё менш. Таму што мець справу з урадам альтэрнатыўнай легітымнасці - гэта адно, а падпісваць кантракты з урадам, які пагражае еўрапейскай бяспецы - зусім іншае. У першым выпадку цябе проста паўшчуваюць за адсутнасць цвёрдых маральных арыенціраў, а ў другім - рызыкуеш нарвацца на канкрэтныя юрыдычныя наступствы.