Колькі каштуе опіум для народа

Як расейскі прапагандыст Яўген Папоў занізіў свой заробак.

Расейскі прапагандыст Яўген Папоў абвінавачваў The Insider у хлусні: нібыта выданне завысіла ягоныя даходы. Аднак перадвыбарная дэкларацыя самога Папова пацвердзіла яго высокія заробкі. Але і гэта яшчэ не ўсё: як высветліў The Insider, кандыдат у дэпутаты Дзярждумы ўтаіў ад выбарчай камісіі (і выбарцаў) частку свайго даходу.

Летась The Insider на аснове звестак за мінулыя гады ацаніў гадавы даход Яўгена Папова на 12,9 млн расейскіх рублёў. У каментары на тэлеканале «Дождь» нядаўняга расследавання ФБК прапагандыст заявіў: «Звесткі The Insider - гэта лухта абсалютная». На той момант перадвыбарная дэкларацыя Папова, у якой павінны адлюстроўвацца ягоныя заробкі, была яшчэ схаваная. 3 жніўня звесткі аб даходах Папова былі апублікаваныя ў СМІ: паводле скрыншотаў дакумента, за 2020 год ён зарабіў 11,4 млн расейскіх рублёў. Афіцыйна выбаркам справаздачу кандыдата Папова яшчэ не размясціў, але гэтыя звесткі ў Twitter верыфікаваў сам Папоў.

Можна было б выказаць здагадку, што за год з моманту публікацыі расследавання The Insider аб даходах прапагандыстаў заробак Яўгена Папова крыху знізіўся. Аднак гэта не так: як нам удалося ўстанавіць, ён, наадварот, вырас. А Папоў падаў у выбаркам няслушныя звесткі.

The Insider атрымаў доступ да звестак ПФР аб стане індывідуальнага асабовага рахунку Папова. Яны змяшчаюць дакладныя сумы выплат прапагандысту. Увогуле ад ФГУП ВГТРК і тэлеканала «Расія» за мінулы год ён атрымаў 13,4 млн расейскіх рублёў.

Мы публікуем скрыншот часткі наяўнага ў распараджэнні рэдакцыі дакумента, але ў выпадку, калі Яўген Папоў будзе адмаўляць сапраўднасць звестак, мы апублікуем яго цалкам. Журналісты пераканаліся ў пэўнасці інфармацыі, атрымаўшы іх пацверджанне таксама з іншых крыніц.

Чаму ў перадвыбарчай дэкларацыі Папова змяшчаюцца заніжаныя звесткі? Мы мяркуем, што пры падачы справаздачы ён мог наўмысна «забыцца» пра часткі даходу ці адняць са свайго заробку 13% НДФЛ, але паводле закона ў выбаркам падаюцца звесткі да выліку падаткаў. Цяпер выбарчая камісія павінна правесці праверку дэкларацыі Папова і апублікаваць звесткі аб выяўленых неадпаведнасцях. Больш строгай санкцыі за ўтойванне даходу для кандыдатаў не прадугледжана.

Кандыдаты даюць справаздачу толькі пра свае асабістыя заробкі: у адрозненне ад дзейных дэпутатаў, даходы сужэнцаў яны не раскрываюць. Але журналістам удалося ўстанавіць суму даходу за 2020 год і Вольгі Скабеевай: яна атрымала 13,7 млн расейскіх рублёў (да выліку падатку).