Як кандыцыянер і адкрытае акно ўплываюць на расход паліва аўтамабіля?

Беларусы правялі эксперымент.

Усім вядома, што пры ўключаным кандыцыянеры ўзрастае выдатак паліва. Шмат хто ў спробах зэканоміць пару капеек у не асабліва гарачае надвор'е ездзяць з адкрытымі вокнамі, піша для abw.by Андрэй Ахрэм. Але шматлікія эксперыменты паказваюць, што калі апусціць у машыне шкло, то выдатак паліва становіцца яшчэ вышэйшым, чым з кандыцыянерам. Пры гэтым большасць такіх досведаў праводзілася на нізкіх бензінавых аўтамабілях. А што атрымаецца на дызельным кампактвэнам?

Сядаем у Renault Scenic II з паўтаралітровым дызелем і для чысціні эксперыменту адпраўляемся на МКАД-2, дзе трафік мінімальны. Стартуем ад развязкі з мядзельскай трасай і рухаемся да маладзечанскай, разварочваемся, едзем назад. Два колы з уключаным кандыцыянерам, два колы з адкрытым акном. На круіз-кантролі ставім максімальна дапушчальныя 120 км/г.

Звесткі расходу атрымаем з бартавога кампутара аўтамабіля. Шматгадовы досвед эксплуатацыі Scenic II паказвае, што рэальны расход паліва супадае з тым, пра які паведамляе машына. Прынамсі ў мяне.

З адкрытым акном шумна, дзьме і смярдзіць

Скідаем лічыльнікі - паехалі. З кандыцыянерам усё добра: ціха, свежа, камфортна. Па дарозе трапляецца ўчастак з дарожнымі работамі, дзе даводзіцца знізіць хуткасць да 40 км/г, але далей толькі раўнамерны рух з пастаяннай хуткасцю. За выключэннем развязак, само сабой. Сярэдні выдатак у такім рэжыме - 4,8 літры на «сотню».

Вяртаемся на зыходную пазіцыю, скідаем лічыльнікі, выключаем кандыцыянер, адкрываем пярэднія вокны, стартуем. Адразу прызнаю, што пасля набору 120 км/г акно ля дзверцы кіроўца я зачыніў амаль цалкам - дзіка задзімае ў вуха. Пакідаю адкрытай толькі фортку пасажыра - пры 24 градусах на вуліцы гэтага дастаткова для таго, каб кіроўцу было свежа. Нават з лішкам.

Дзеля эксперыменту можна і пацярпець, але ездзіць так пастаянна - выбачайце. Роў ветрыку спрэс заглушае музыку, водары так сабе. Ну і паветранымі патокамі прадуць можа папросту. А калі ззаду сядзіць дзіця ў крэсле? І так, калі паветра на вуліцы прагрэецца градусаў да 30 або больш - ахалоджванне патокамі гарачага паветра будзе вельмі не вельмі.

Сваю лепту ў другую частку эксперыменту ўнеслі дзве фуры, якія з хуткасцю на 0,0005 км/г вышэй апярэджвалі іншыя фуры. Ды вы і самі ведаеце, як дальнабойнікі на трасах адзін аднаго апярэджваюць. Прыйшлося некаторы час ехаць у іх тэмпе. У спробах нівеліраваць часавы правал у хуткасці вымушаны быў трохі «паддаць».

Крыху больш за паўгадзіны пакут - і нарэшце спыняемся, каб завяршыць эксперымент і паглядзець на расход. 4,7 літра на 100 кіламетраў! Атрымалася менш, чым з кандыцыянерам, але, па сутнасці, маем статыстычную хібнасць. Крыху больш пастаяў на развязцы, не так націснуў на «газ» пры выездзе з яе або пасля дарожных работ, упёрся ў фуру - атрымаў мінімальную разбежку.

Вердыкт

У выпадку з дызельным «Сцэнікам» мы атрымалі практычна аднолькавы расход паліва з уключаным кандыцыянерам і з адкрытым акном. Розніцу ў 0,1 літра на 100 кіламетраў, паводле звестак бартавога кампутара, можна лічыць хібнасцю і спісаць на неідэальныя ўмовы эксперыменту. Ці то дызельнаму рухавіку абсалютна ўсё роўна, ці то ў выпадку з аэрадынамікай Scenic II «кандэй» і адкрытае акно ўносяць прыкладна аднолькавую лепту ў расход паліва.

Але ездзіць у сучасным аўтамабілі, адкрыўшы вокны, а не карыстаючыся кандыцыянерам або клімат-кантролем, - мазахізм. Няма абсалютна нічога прыемнага ні ў шуме ветру, ні ў тым, што табе дзьме ў вуха, ні ў водарах і пылу з вуліцы. З кандыцыянерам ціха, камфортна, чыстае паветра, якое прайшло праз салонны фільтр, і тэмпература менавіта тая, якая неабходная тут і цяпер.